महिला स्वास्थ्य स्वयं सेविकाहुकन सम्मान

पहुरा समाचारदाता
हसुलिया, ८ पुस । कैलारी गाउँपालिका वडा नम्बर ४ के महिला स्वास्थ्य स्वयं सेविकाहुकनहे सम्मान कैगिल बा ।

वडा नम्बर ४ वडा कार्यालयसे वडामे कार्यरत १३ जाने महिला स्वास्थ्य स्वयं सेविकाहुकनहे टमान सामान वितरण करटी सम्मान कैगिल बा । गाउँपालिका अध्यक्ष राजसमझ चौधरीके वडका पहुनामे हुइल कार्यक्रममे उहाँ महिला स्वास्थ्य स्वयं सेविका निस्वार्थ भावनासे दिन रात नइकहिके रातदिन विना तलब खटटी रहल ओरसे ओइनके काम कैना मनोबल बह्राइक लाग सम्मान करल बटैलै ।

उहाँ कहलै, हम्रे जननिर्वाचित हुके आइलपाछे महिला स्वास्थ्य स्वयं सेविकाहुकनहे विशेष रुपमे हेरे करना भावना रख्ले बटी । सेवा निवृत हुइलेसे एक लाख रुप्या नगद डेना व्यवस्था करले बटी । पहिले यी सेवा सुविधा नइरहे । कलेसे कलेसे अब्बे ओइने फोन, यातायात पाँच सय रुप्या पैटी आइलमे २५० रुप्या बृद्धि करलफे करले बटी ।’

महिला स्वास्थ्य स्वयं सेविकाहुकन सम्मान कार्यक्रममे वडा सदस्य लक्ष्मी चौधरी, भल्मन्सा तिर्थ प्रसाद नेपाल, आधारभूत स्वास्थ्य चौकी व्यवस्थापन समिति सदस्य रामसेवक चौधरी, महिला स्वास्थ्य स्वयं सेविका पवित्रा सेढाई लगायत मन्तव्य व्यक्त करल रहिट ।

वडा नम्बर ४ अध्यक्ष तथा आधारभूत स्वास्थ्य चौकी व्यवस्थापन समितिके अध्यक्ष ठागुराम चौधरीके अध्यक्षतामे हुइल कार्यक्रममे स्वागत मन्तव्य वडा सदस्य हरिद्वारी चौधरी करल ओ संचालन आधारभूत स्वास्थ्य चौकी के गाउँके इन्चार्ज रमेश रोकाया करल रहिट ।

महिला स्वास्थ्य स्वयं सेविकाहुकन सम्मान स्वरुप एक ठो दाराज, लोगोसहिटके झोला, त्रिपाल एक थान, स्टिल गिलास २ ठो, कचौरा, कप एक÷एक थान, छाता, इलेक्ट्रिक चर्जेवल टर्च एक थान वितरण इन्चार्ज रोकाया बटैलै । कार्यक्रममे वडा सदस्य सुवा परियार, महिला स्वास्थ्य स्वयं सेविका, वडा कार्यालयके कर्मचारीहुकनके सहभागिता रहल रहे ।