जोशीपुरके भलमन्सा हुक्रनहे दैगिल क्षमता अभिवृद्धि तालिम

सुधराम दहित
जोशीपुर÷९ पुस । कैलालीके जोशीपुर गाउँपालिका क्षेत्र भित्तरके भलमसन्सा हुक्रनहे आदिवासी जनजाती महासंघ जोशीपुरके सभाहलमे क्षमता अभिवृद्धि तालिम दैगिल बा ।

४५ भलमन्साहुक्रनहे आर्थिक एवं सामाजिक विज्ञ डा.राम बहादुर चौधरी क्षमता अभिवृद्धिके तालिम डेलै । जोशीपुर भलमन्सा समाजके विधानमे उल्लेखित विषय वस्तुमे क्षमता अभिवृद्धिके तालिम डैगिल प्रशिक्षक डा. राम बहादुर चौधरी बटैलै । थारु समाजके कला, संस्कार, रितिरिवाज, चालचलन, पसम्पराके विषयमे छलफल ओ मरुवामे रना डेउटाके विषयबस्तुमे फे छलफल कैगिल रहे । थारु गाउँ समाज परिचालन कैना मुख्य जिम्मेवारी भलमन्सनके रलेक वरसे भलमन्साहुक्रनहे कानुनके विषयमे जानकार हुईना जरुरी रहल फे वहाँ बटैलै ।

भलमन्सा हुक्रे कानुनके नियम भित्तर रहिके आपन कार्य सम्पादन करेक पर्ना ओ अईना आर्थिक वर्षमे भलमन्सनके लग अलग्गे भलमन्सा शिर्षक धर्के वजेट छुट्यईना कार्यक्रमके प्रमुख अतिथि एवं जोशीपुर गाउँपालिका अध्यक्ष चित्र बहादुर चौधरी बटैलै । निस्वार्थ भावनासे सामाजिक सेवा कर्ना संस्था हुइलेक वरसे भलमन्सा प्रथाहे संरक्षण करेपर्ना फे वहाँ बटैलै ।
भलमन्सानमे अईना चुनौती ओ समस्याहे मजासे सहजिकरण करे सेक्जीना तालिम पश्चात जोशीपुर भलमन्सा समाजके संयोजक एवं कार्यक्रमके सभापति शक्ताराम चौधरी बटैलै । जोशीपुर गाउँपालिकाके आर्थिक सहयोग ओ जोशीपुर भलमन्सा समाजके आयोजनामे हुईल कार्यक्रमहे सहजीकरण विवस चौधरी कर्ले रहै ।