मानव अधिकार उलंघनके घटना काहे बह्रटा ?

इन्सेक सुदूरपश्चिम प्रदेशसे तथ्याङ्क अनुसार कैलाली जिल्लामे एक वर्षमे ४ सय १७ जाने पीडित हुइल डेखल बटै । नेपाल मानव अधिकार वर्ष पुस्तक २०२४ प्रकाशनके लाग संकलन करल तथ्याङ्कमे कैलाली जिल्लाके मानव अधिकारके अवस्थाबारे जानकारी सन २०२३ जनवरीसे २०२३ डिसेम्बर २१ तारेखसम ४ सय १३ घटनामे ३ सय ५७ महिला, ४५ बालिका ओ १५ पुरुष करके ४ सय १७ जाने पीडित रहल इन्सेकसे अभिलेख हुइल बा ।

एक वर्षके अवधीमे महिला अधिकारसे ३ सय ५७ जाने पीडित हुइल बटै । जेम्ने घरेलु हिंसासे २ सय ८०, बलात्कारसे २, बलात्कार प्रयाससे ९, बेचविखनसे चार, बहुविवाहसे २९ ओ एकजाने सुत्केरीके मृत्यु हुइल उहाँ जनैलै । असुरक्षित गर्भपतनसे एक जाने महिलाके मृत्यु हुइल ओ परिवारजनसे तीन जाने महिलाके हत्या करल इन्सेकसे अभिलेख करल बटैलै । अन्य पक्षसे एक जाने महिला प्रहरीउप्पर दुव्र्यवहार हुइल इन्सेकमे अभिलेख बा । यी अवधीमे बालअधिकारसे ४५ जाने पीडित हुइल बटै । जेम्ने मध्ये बलात्कारसे १८, बेचविखनसे तीन, यौनदुव्यवहारसे १९, बलात्कार प्रयाससे चार ओ बालिका बालविवाहसे एक जाने वालिका पीडत हुइल अभिलेख हुइल बा ।

ओस्टेक १५ जाने पुरुष पीडित हुइल बटै । जेम्ने मध्ये परिवारजनसे दुई ओ अन्य पक्षसे दुई करके चार जाने पुरुषके हत्या हुइल बा । चार जाने पत्रकारउप्पर कुटपिट करल बा । एक बन्दीके उपचारके क्रममे मृत्यु हुइल बा कलेसे एक जाने पुरुषके प्रहरी हिरासतमे धारल क्रममे मृत्यु हुइल इन्सेकसे अभिलेख करले बा । सन् २०२२ जनवरीसे डिसेम्बर महिनासमके अवधीमे कैलाली जिल्लामे ३ सय ११ जाने पीडित हुइल रहिट । कलेसे राज्यसे सात जाने पीडित हुइल इन्सेकसे अभिलेख करल रहे । अघिल्का वर्षके तुलनामे यी वर्ष मानव अधिकार उल्लंघनके घटनामे वृद्धि हुइल बा ।