जिल्ला प्रहरी कार्यालय डोटीमे नवनिर्मित भवनके उद्घाटन

पहुरा समाचारदाता
डोटी, ११ पुस । जिल्ला प्रहरी कार्यालय डोटीमे नवनिर्मित भवनके उदघाटन हुइल बा ।

प्रहरी महानिरीक्षक बसन्तबहादुर कुँवर जिल्ला प्रहरी कार्यालय डोटी परिसरमे नवनिर्मित कार्यालय भवन, कार्यालय प्रमुख निवास, सिनियर प्रहरी अधिकृत आवास, व्यारेक, हिरासत कक्ष तथा मेश भवनके मंगरके रोज आयोजित एक कार्यक्रमबीच उदघाटन करले बटै ।

उ अवसरमे प्रहरी महानिरीक्षक कुँवर समाजमे डेखा पर्ना नविनतम चुनौती ओ उहीसे समग्र समाजके शान्ति सुरक्षामे पर्ना असरके साथे विपदके घटनासे उत्पन्न हुई सेक्ना प्रतिकुल परिस्थिति ओ परिणामके अध्ययन, विश्लेषण करके उपयुक्त सुरक्षा योजना तयार करके प्रहरी जनशक्ति हरदम तयारी अवस्थामे रहे पर्ना बटैलै ।

समुदाय–प्रहरी साझेदारी कार्यक्रम अन्तर्गत स्थानीय निकायसंगके सहकार्यम जनअपेक्षा अनुरूपके प्रहरी सेवा प्रदान करके समाजमे शान्ति ओ अराजगता फैलैना तथा अपराधिक क्रियाकलापमे संलग्न व्यक्ति वा समूह विरुद्ध सशक्त रूपमे प्रस्तुत हुके उच्च मनोवलके साथ कार्य सम्पादन कैना उहाँ निर्देशन डेलै ।

सुदूरपश्चिम प्रदेश प्रहरी कार्यालयके प्रमुख प्रहरी नायव महानिरीक्षक भरत बहादुर बोहरा धन्यवाद मन्तव्य व्यक्त करल उ कार्यक्रममे डोटी जिल्लाके प्रमुख जिल्ला अधिकारी गोपालप्रसाद अर्याल ओ दिपायल सिलगढी नगरपालिकाके प्रमुख बाजी सिंह खड्का शुभकामना मन्तव्य व्यक्त करल रहिट ।

जिल्ला प्रहरी कार्यालय डोटीके प्रमुख प्रहरी उपरीक्षक बिष्णुहरी कोईराला स्वागत मन्तव्य व्यक्त करल उ कार्यक्रममे सुदूरपश्चिम प्रदेश प्रहरी कार्यालय धनगढीके प्रहरी नायव उपरीक्षक सुमन दाहाल भवन निर्माण सम्बन्धी प्रतिवेदन प्रस्तुत करल रहिट । नेपाल सरकारके नियमित बजेटसे कुल १० करोड ८ लाख ६३ हजार ४ सय ६४ रूप्या लागतमे उ भवन निर्माण कार्य सम्पन्न हुइल हो ।

कार्यक्रममे डोटी जिल्लाके जिल्ला न्यायाधीश, नेपाल प्रहरी श्रीमती संघके अध्यक्ष, जिल्लास्थित सुरक्षा निकायके प्रमुख, टमान राजनैतिक दलके प्रमुख एवं प्रतिनिधि, स्थानीय जनप्रतिनिधि, टमान संघ संस्थाके प्रमुख एवं प्रतिनिधि, अमर प्रहरी परिवारके सदस्य, पूर्व प्रहरी संगठनके पदाधिकारी, स्थानीय समाजसेवी, संचारकर्मी एवं स्थानीयवासीहुकनके उपस्थिति रहल रहे ।

ओस्टेक करके प्रहरी महानिरीक्षक बसन्त बहादुर कुँवर जिल्ला प्रहरी कार्यालय डोटीमे कार्यरत प्रहरी अधिकृत तथा जवानहुकनहे समसमायिक विषयमे आवश्यक निर्देशन समेत डेलै । कार्यक्रमके अवसरमे प्रहरी महानिरीक्षक कुँवर भवन निर्माण कार्यमे सहयोग पुगैना टमान महानुभावहुकनहे प्रशंसा–पत्रफे प्रदान करलै ।