प्रदेशस्तरीय अपराध अनुसन्धान समीक्षा
पहुरा समाचारदाता
धनगढी, ११ पुस । सुदूरपश्चिम प्रदेशस्तरीय अपराध अनुसन्धान समीक्षा गोष्ठी हुइल बा ।
सूदूरपश्चिम प्रदेश सरकारके आन्तरिक मामिला तथा कानूनमन्त्री शिवराज भट्टके प्रमुख आतिथ्यमे नेपाल प्रहरी प्रधान कार्यालय अपराध अनुसन्धान विभाग ओ सुदूरप्रदेश प्रहरी कार्यालय धनगढीसे संयुक्त रूपमे प्रदेशस्तरीय अपराध अनुसन्धान समीक्षा कैगिल हो ।
कार्यक्रममे आन्तरिक मामिला तथा कानूनमन्त्री भट्ट समाजमे शान्ति सुरक्षालगायत अपराध अनुसन्धान कैना प्रहरी ओ नागरिक विचके सम्बन्ध सुमधुर हुई पर्ना बटैले बटै । प्रहरीसे अपराध अनुसन्धानहे थप प्रभावकारी बनाइक लाग समयसापेक्ष नयाँ प्रविधिके प्रयोगमे जोड डेटी जाई पर्ना उल्लेख करटी उहाँ प्रहरी कार्यालयके भौतिक संरचना निर्माण तथा स्रोतसाधन सम्पन्न बनाके अपराध अनुसन्धान कार्यमे प्रहरीहे शसक्त बनैना प्रदेश सरकार सदैव प्रतिवद्ध रहल बटैलै ।
प्रहरी महानिरीक्षक बसन्तबहादुर कुँवर साधन स्रोतके सीमितता, भूगोलके जटिलता ओ विविध चुनौतीके बाबजुद यी प्रदेशमे घटित विविध घटनाके सफल अनुसन्धान करके कानूनी राज्यके प्रत्याभूति डेहुवाइना यी प्रदेश अन्तर्गतके प्रहरी कर्मचारीसे निभाइल भूमिकाके प्रशंसा करलै । अपराध अनुसन्धानहे वैज्ञानिक, व्यवस्थित एवम् प्रमाणमुखी बनाके न्यायिक प्रकृयामे सही, निष्पक्ष ओ पूर्ण व्यावसायिक हुके कार्य सम्पादन कैना अपराध प्रवृत्ति एवम् तथ्याङकहे समेत केन्द्रबिन्दुमे धारके योजनाबद्ध ढंगसे आघे बह्रना जरूरी रहल बटैलै ।
प्रहरी महानिरीक्षक कुँवरसे प्रभावकारी ओ वस्तुनिष्ठ अनुसन्धान फौजदारी मुद्दा सफलताके कडी रहल ओ यकर लाग अपराध अनुसन्धानके क्षेत्रमे आवश्यक पर्ना घटनास्थल सुरक्षा, प्रमाण संकलन, संरक्षण ओ परीक्षणसे मिसिल तयार कैना जिम्मेवारीके लाग अनुसन्धान कार्यमे संलग्न प्रहरी कर्मचारीमे कानूनी ज्ञान, विशेष सीप, दक्षता ओ लगनशीलता आवश्यक रहना बटैलै । साथे अपराध अनुसन्धानके लाग ज्ञान, सीप, दक्षता, अनुभव, अथक लगाव ओ दृढ संकल्पके अतिरिक्त सरोकारवाला निकाय ओ समाजसँगके सहकार्य ओ समन्वय समेत महत्वपूर्ण रहनामे उहाँ जोड डेलै ।
पीडित तथा साक्षी संरक्षणके सुनिश्चितता, मानव अधिकारके संरक्षण, महिला तथा बालबालिका विरुद्धके हिंसाजन्य घटनाके अनुसन्धानमे थप संवेदनशिल हुके शून्य सहनशीलताहे गम्भीरताके साथ मनन कैना उपस्थित सक्कु प्रहरी कर्मचारीहे उहाँ निर्देशन समेत डेलै ।
कार्यक्रममे उच्च अदालत दिपायलके न्यायाधीश दिनेश प्रसाद यादव ओ कैलाली जिल्लाके प्रमुख जिल्ला अधिकारी धर्मेन्द्र कुमार मिश्र गोष्ठीके महत्वबारे चर्चा करटी आ–अपन शुभकामना मन्तव्य व्यक्त करल रहिट ।
नेपाल प्रहरी प्रधान कार्यालय अपराध अनुसन्धान विभागके प्रहरी अतिरिक्त महानिरीक्षक टेकबहादुर तामाङ धन्यवाद ज्ञापन करल उ गोष्ठीमे नेपाल प्रहरी प्रधान कार्यालय अपराध अनुसन्धान विभागके प्रहरी वरिष्ठ उपरीक्षक बसन्त रजौर स्वागत मन्तव्य एवं गोष्ठीबारे जानकारी डेहल रहिट ।
नेपाल प्रहरी प्रदेश कार्यालयके प्रहरी वरिष्ठ उपरीक्षक दिलिपसिंह देउवा, सुदूरपश्चिम प्रदेश प्रहरी कार्यालयके प्रहरी वरिष्ठ उपरीक्षक दिल्लीराज बिष्ट, सरकारी वकिल कार्यालय कञ्चनपुरके सहायक जिल्ला न्यायाधिवक्ता हरि प्रसाद उपाध्याय, सुदूरपश्चिम प्रदेश अन्तर्गतके ९ जिल्लाके जिल्ला प्रहरी कार्यालयके प्रमुख, नेपाल प्रहरी प्रधान कार्यालयके प्रतिनिधिसे अपराध अनुसन्धानके समग्र वस्तुस्थिति ओ अनुसन्धानमे करल नवीन प्रयोगके विषयमे प्रस्तुतीकरण करल रहिट । उ गोष्ठीमे अपराध अनुसन्धानमे डेखल समस्या ओ ओकर समाधान लगायतके विषयवस्तुमे विस्तृत छलफल करल रहे ।
गोष्ठीमे प्रहरी नायव महानिरीक्षक, जिल्लास्थित सुरक्षा निकायके प्रमुख, संचारकर्मी एवम् प्रदेश अन्तर्गत अपराध अनुसन्धान शाखामे कार्यरत प्रहरी अधिकृतहुकनके समेत सहभागिता रहे ।
