स्टार सिटीहे फारवेष्ट पशुपति कपके उपाधि

पहुरा समाचारदाता
धनगढी, १४ पुस । एनआरएनए छैटौं फारवेष्ट पशुपति कप २०८० के उपाधि साविक विजेता स्टार सिटी युवा क्लव धनगढी जिटले बा ।

शनिच्चरके धनगढी रंगशालामे हुइल फाईनल खेलमे ईलाईट युवा क्लव कैलारी गाउँपालिका वडा नम्बर ६ वनकट्टाहे ३–२ से हरैटी लगातार दुसरा चो स्टार सिटी च्याम्पीयन हुइल हो । फारवेष्ट पशुपति युवा क्लवके आयोजनामे धनगढीमे हुइल प्रतियोगिताके रोमाञ्चक फाईनल खेलमे पहिल हाफमे चार गोल हुइल हो कलेसे दुसरा हाफमे एक गोल केल हुइल हो ।

पहिल हाफके ९ मिनेटमे पेनाल्टी मार्फत गोल करटी स्टार सिटीसे अग्रता बनाइल । ईलाईटके खेलाडीसे फल करलपाछे पाइल पेनाल्टीहे क्षितिज भण्डारीसे गोलमे परिणत करलै । पहिल हाफके २६ मिनेटमे ईलाईटसे खेल बराबरीमे नानल । स्टार सिटीके खेलाडीसे डिवक्सभिटर फल करलपाछे प्राप्त पेनाल्टीहे ईलाईटके विदेशी खेलाडी नोग्नाउ नोग्नाउसे गोल करलै । एक एक बरीबरमे रहल अवस्थामे पहिल हाफके ३९ औं मिनेटमे ईलाईटके विनोद केसी गोल करटी अपन टीमहे अग्रता डेहुवइलै । मने उ अग्रता ३ मिनेटसे ढेर समय टिके नइसेकल । पहिल हाफके ४१ औं मिनेटमे स्टार सिटीके लाग प्रदीप लामा गोल करटी खेलाडीहे २–२ के बराबरीमे पुगैलै ।

पहिल हाफमे बराबरी हुइल अवस्थामे दुसरा हाफके २२ औं मिनेटमे गोल करटी प्रदीप लामा व्यक्तिगत दुसरा गोल करटी स्टार सिटीहे अग्रता डेहुइलै । ओकरपाछे कौनोफे टीमहे गोल हुई नइसेकलपाछे स्टार सिटी दुसरा चो च्याम्पीयन बनल हो । स्टार सिटीहे च्याम्पीयन बनैना फाईनलमे दुई गोल करल प्रदीप लामा म्यान अफ द म्याच हुइलै । उहाँ नगद ५ हजार प्राप्त करले बटै । च्याम्पीयन हुइलसंगे स्टार सिटीसे नगद ५ लाख प्राप्त करले बा । पहिल सहभागीता जनाके उपविजेता बनल ईलाईटसे नगद २ लाखमे चित्त बुझैलै ।

प्रतियोगिताके अधिकांश विधामे स्टार सिटीसे कब्जा जमैले बा । स्टार सिटीके प्रदीप लामा प्रतियोगिताके सर्वोकृष्ट खेलाडी बन्लै । उहाँ नगद २५ हजार प्राप्त करलै । स्टार सिटीके अमानत सेख उत्कृष्ट गोलरक्षक, कुवेर सिंह सर्वाधिक गोलकर्ता हुइलै । ओइने जनही नगद १५ हजार प्राप्त करलै । स्टार सिटीके निलेश विष्ट उत्कृष्ट प्रशिक्षक हुइलै । उहाँ नगद १० हजार पैलै । ईलाईके चेतन थारु उत्कृष्ट रक्षक बन्लै । उहाँफे नगद १५ हजार प्राप्त करलै । आयोजक फारवेष्ट पशुपति युवा क्लवके सुशिल विश्वकर्मा उदयमान खेलाडी बन्लै । उहाँ नगद १५ हजार प्राप्त करलै ।

च्याम्पीयन बनल स्टार सिटीके कप्तान कुवेर सिंह अपन टीम अघिल्का खेल जस्टे तालमेल मिलाके खेलल कारण च्याम्पीयन हुइल बटैलै । स्टार सिटीके प्रशिक्षक निलेश विष्ट टीमके रणनिति अनुसार खेलके उपाधि जिटल बटैलै । उहाँ अपन खेलाडीसे शत प्रतिशत डेके खेलल बटैलै ।

पहिल चो फारवेष्ट कपमे सहभागीता जनाके उपविजेता बनल ईलाईट क्लवके कप्तान योहन्ना चौधरी अपने मजा खेलल हुइलेसेफे भाग्यसे साथ नइडेहल बटैलै । उहाँ पाइल मौकासे गोल नइहुके टीम पराजित हुइल बटैलै । ईलाईटके प्रशिक्षक अमर चौधरीसे आजके दिन अपन पक्षमे नइरहल कहटी मजा खेलेबेरफे उपाधि जिटे नइसेकल बटैलै । उहाँ आशा करल खेलाडी सोचल अनुसारके प्रदर्शन करे नइसेकल स्वीकारलै ।

विजयी खेलाडीहुकनहे एक समारोहके बीच पुरस्कार वितरण करल बा । समापन कार्यक्रमके प्रमुख अतिथि सुदुरपश्चिम प्रदेश खेलकुद परिषदके सदस्य सचिव दिपकवहादुर सिंह, विशिष्ठ अतिथि गैर आवासीय नेपाली संघके मुख्य कार्यकारी अधिकृत राजेन्द्रकुमार रावत लगायत विजयी खेलाडीनहे पुरस्कार वितरण करलै । प्रतियोगिताके मुख्य प्रवद्र्धकमे सुदुरपश्चिम प्रदेश खेलकुद परिषद रहल रहे । कलेसे मुख्य प्रायोजकमे एनआरएनए रहल रहे ।