बाँझ जग्गा भाडामे डेना तयारी करटीः मन्त्री चौधरी
पहुरा समाचारदाता
धनगढी, १७ पुुस । सुदूरपश्चिम प्रदेश सरकारके भूमि व्यवस्था कृषि तथा सहकारी मन्त्री रामेश्वर चौधरी बाँझ जग्गा भाडामे डेना तयारी करटी रहल बटैले बटै ।
परिवर्तनका लागि कार्यरत यूवा समुह (याक) नेपाल, लिवर्ड, ओ खाद्य अधिकार संजाल सुदूरपश्चिम प्रदेशके संयुक्त ओजनामे प्रदेशभिटरके छोट ओ भूमिहिन सीमान्तकृत किसानहुकनके जिविकोपार्जन प्रवद्र्धन, उत्पादन बृद्धिके लाग नीतिगत संवाद (प्रदेश करार खेती सम्बन्धी मस्यौदा कार्यविधि) तथा अन्तरक्रिया कार्यक्रममे मन्त्री चौधरी उ बाट बत्वाइल रहिट ।
उहाँ कहलै, मन्त्रालयसे बाँझ जग्गा भाडामे टमान मेरिक व्यावसायिक खेती कैना सोचमे बा, अब्बे सरोवाला संघसंस्थाके नानल प्रस्तावसे झन मजा हुइल बा । यी मस्यौदाके अन्तिम चरणमे नानक लाग समिति गठन कैना बा । समितिसे हलहाली काम आघे बह्रैना जरुरी बा ।’ विद्यालयसंग्गे व्यक्तिगत जग्गाफे बाँझ रहल बा,’ मन्त्री कहलै, ‘उहीहे सदुपयोग करे सेक्लेसे स्थानीयस्तरमे रोजगारी सृजनाके साथे आम्दानीके स्रोत बह्राई सेक्जाई ।’
प्रदेशमे जग्गा भाडामे लेना÷डेना कामहे व्यवस्थित बनाके खेती करे चहना भूमिहीन, मुक्त हलिया, मुक्त कमैया, मुक्त कमलरी, द्वन्द पीडित ओ विस्थापित, साना किसान, विपन्न परिवार ओ न्यून आय रहल कृषक परिवारहे भाडामे जग्गा लेना व्यवस्था मिलैना कार्यविधि मन्त्रालयसे कार्यविधि बनाई लागल हो । कार्यविधि तयार करके व्यक्ति, संघ–संस्था तथा सरकारी स्वामित्वमे रहल बाँझ कृषियोग्य जमिनखेती उपयोग कैना लक्ष्य राखल याक नेपालके परियोजना संयोजक देवी खनाल बटैलै ।
उहाँ करार खेती प्रवद्र्धन कार्यविधिके मस्यौदाफे प्रस्तुत करल रहिट ।
यिहे विच मंगरके रोज कार्यविधिहे अन्तिम रुप डेना भूमि व्यवस्था कृषि तथा सहकारी मन्त्रालयमे एक समिति गठन कैगिल बा । मन्त्रालयके भूमि व्यवस्थापन महाशाखा प्रमुख धर्मराज ओझाके संयोजकत्वमे पाँच सदस्यीय कार्यविधि निर्माण समिति बनाइल बा । समितिके सदस्यमे मन्त्रालयके कानुन अधिकृत रामकुमार झा, कृषक समूह नेपालके सुदूरपश्चिम अध्यक्ष प्रकाश थापा, लि–वर्डके परियोजना संयोजक इन्द्रेश्वर मण्डल ओ याक नेपालके परियोजना संयोजक देवी खनाल सदस्य रहल बटै ।
कार्यक्रममे भूमि व्यवस्था कृषि तथा सहकारी मन्त्रालयके प्रदेश सचिव मदनसिंह धामी, कृषि ज्ञान केन्द्र कैलालीके प्रमुख खगेन्द्र प्रसाद शर्मा, मन्त्रालयके भूमि व्यवस्थापन महाशाखा प्रमुख धर्मराज ओझा, मन्त्रालयके बरिष्ठ कृषि अधिकृत टिकाराम थापा, लिवर्डके परियोजना संयोजक इन्द्रेश्वर मण्डललगायतसे उ मस्यौदाहे आउर मजा बनाइक लाग सुधारके लैजैना सुझाव डेहल रहिट ।
कार्यक्रममे राज्यमन्त्री कैलाश चौधरी, मन्त्रालयके कर्मचारी, कृषक संजालके प्रतिनिधिहुकनके सहभागिता रहल रहे । कार्यक्रममे सहजीकरण याक नेपालके परियोजना संयोजक देवी खनाल ओ कार्यक्रममे याक नेपालके कार्यकारी निर्देशक डबलबहादुर बम के उद्देश्यबारे जानकारी डेहल रहिट ।
