भादा महोत्सव सुरु
होमस्टेसे सस्कृतिसंगे पर्यटन प्रवर्द्धनमे टेवाः मन्त्री देउवा
पहुरा समाचारदाता
धनगढी, १७ पुस । धनगढी उपमहानगरपालिका–१६ भादामे थारु होम–स्टे गाउँ भादा पर्यटन विकास तथा व्यवस्थापन समिति कैलालीके आयोजनामे मंगरके रोजसे थारु होम–स्टे गाउँ भादा महोत्सव २०८० सुरु हुइल बा ।
कार्यक्रमके वडका पहुना ओ विशिष्ट पहुना रहल सुदूरपश्चिम प्रदेश सरकारके भौतिक पूर्वाधार विकास मन्त्रालयके माननीय मन्त्री प्रकाशबहादुर देउवा ओ भूमि व्यवस्था कृषि तथा सहकारीके माननीय मन्त्री रामेश्वर चौधरी दुनु जाने डिया सुल्गाके करैक डारु छाँकी धरकैटी महोत्सवके उदघाटन उदघाटन करल रहिट ।
उदघाटन कार्यक्रममे बोल्टी वडका पहुना मन्त्री देउवा महोत्सवसंगे होमस्टे संचालन हुइलपाछे सुदूरपश्चिमके कला संस्कृतिके संरक्षणसंगे पर्यटन प्रवद्र्धनमे टेवा पुगल बटैलै । उहाँ होमस्टेके विकास करलेसे पर्यटकके आगमनके संख्या बह्रई सेक्ना बटैलैं । उहाँ प्रदेश सरकारके ओरसे आवश्यक सहजीकरण कैना प्रतिवद्धताफे जनैलै ।
भूमि व्यवस्था कृषि तथा सहकारीके माननीय मन्त्री रामेश्वर चौधरी होमस्टे प्रवद्र्धनके लाग डगरघाटफे मजा हुई पर्ना बटैलै । उहाँ कहलै, ‘पर्यटक प्रकृति ओ संस्कृतिमे रमैठै । यहाँ प्रकृतिफे बा, संस्कृतिफे बा मने डगरघाटके समस्या बा ।’ धनगढी बजारसे भादा होमस्टे खासे दुर नइरहल मने सडक मजा बनाई सेक्लेसे घरबासके लाग यहाँ उचित रहल बा ।’
प्रदेशसभाके उपसभामुख कोइलीदेवी चौधरी भादा होमस्टेसे प्रदेश सरकारहे बुझाइल ज्ञापनपत्र प्रदेश सरकारसे कार्यान्वयन ओ आघे बह्रैना जरुरी रहल बटैली ।
धनगढी उपमहानगरपालिकाके नगर उपप्रमुख कन्दकला राना धनगढीमे थारु, रानाथारु सांस्कृतिक संग्राहलय स्थापना हुइल मने संचालन हुई नइसेकल बटैली । उहाँ कहली,‘ थारु, रानाथारु समुदाय कला संस्कृतिके धनी समुदाय रहल बटै । यिहीहे संरक्षण ओ पवद्र्धन करे सेक्लेसे पर्यटकके संख्या बह्राई सेक्जाई ।
कार्यक्रममे वडा नम्बर १६ के वडा अध्यक्ष रामलाल चौधरी, होमस्टे महासंघके अध्यक्ष प्रेमशंकर मर्दनिय, नेपाली काँग्रेस कैलाली क्षेत्र नम्बर ५ के सभापति भीम पडाल, निसर्ग अस्पताल प्रालिके अध्यक्ष तिर्थराज पन्तलगायत मन्तव्य व्यक्त करल रहिट । थारु होम–स्टे गाउँ भादा पर्यटन विकास तथा व्यवस्थापन समिति कैलालीके अध्यक्ष लक्ष्मीनारायण चौधरीके अध्यक्षतामे हुइल उदघाटन कार्यक्रममे उहाँ प्रदेश सरकारहे नौ बुँदे मागसहित ज्ञापनपत्र बुझाइल रहिट । कार्यक्रममे स्वागत मन्तव्य समितिके सचिव चेतराम चौधरी ओ संचालन गायक÷गायिका राज चौधरी ओ सुनिता चौधरी करल रहिट ।
यिहे पुस १७ गतेसे २२ गतेसम थारु होम–स्टे गाउँ भादा महोत्सव २०८० संचालन हुइना बा । महोत्सवमे दैनिक थारु समुदायके स्थानीय तथा राष्ट्रिय कलाकारके प्रस्तुती रहना समितिके अध्यक्ष लक्ष्मीनारायण चौधरी बटैलै । उहाँ थारु कला, संस्कृति, भेषभुषा ओ खानपान लोप हुई लागल अवस्थामे युवा पुस्ताहे जानकारी डेना उद्देश्यसे हरेक वर्ष महोत्सवके आयोजना करटी आइल बटैलै । उद्घाटनके रोज थारु समुदायके कला संस्कृति झल्कना सखिया नाच, लाठी नाच, परम्परागत नाच ओ थारु कलाकारहुकनके प्रस्तुति डेखागिल बा । ओहे अवसरमे महोत्सवमे करुइयनहे कदरपत्रसे सम्मान कैगिल बा ।
