महिला कृषक समुहहे कृषि मेसिनरी सामान हस्तान्तरण
पहुरा समाचारदाता
हसुलिया, १९ पुस । कैलाली जिल्लाके कैलारी गाउँपालिका कृषि शाखासे रैथाने थारु आलु ओ तोरी पवद्र्धन कार्यक्रम अन्र्तगत वडा नम्बर २ कैलारी गाउँके जागरण महिला कृषक समुहहे मेसिनरी सामान हस्तान्तरण कैगिल बा ।
गाउँपालिका उपाध्यक्ष भगवतीकुमारी चौधरीके वडका पहुनामे हुइल एक कार्यक्रमके विच जागरण महिला कृषक समुहहे दुई ठो पावर टिलर ओ दुई ठो पानी मोटर हस्तान्तरण कैगिल बा । कार्यक्रममे बोल्टी गाउँपालिका उपाध्यक्ष भगवतीकुमारी चौधरी रैथाने थारु आलुके अपने पहिचान ओ स्वदिस्ट रहल ओरसे उत्पादन हुइल आलु ओ लाही विक्री कैना कौनो समस्या नइरहल बटैली ।
उहाँ कहली, ‘रैथाने थारु आलुके उत्पादन बह्राई सेक्लेसे भारतसे आलु नाने पर्ना अवस्था नइआइ । हमार उत्पादन बाह्रै महिना नइपुगलपाछे भारतसे पर्ना अवस्था बा । लाहीक तेलफे बाह्रोमास नइपुगलपाछे भारतसे तेल नानके खैना अवस्था बा । जेम्ने रहल मिसावटसे हमार शरिरहे असर परटी रहल बा ।’ उपाध्यक्ष कहली, ‘अपनेनके उत्पादन करी बजारी कैना जिम्मा हमार हो ।’
कैलारी गाउँपालिका कृषि शाखासे आर्थिक बर्ष २०८०÷०८१ रैथाने थारु आलु ओ तोरी प्रवद्र्धन कार्यक्रम अन्र्तगत दुई लाख ५० हजार अनुदान ओ समुहकेफे दुई लाख ५० हजार लगानी करके दुई ठो पावरटिलर ओ दुई ठो पानी मोटर खरिद कैके समुहहे हस्तान्तरण बा ।
कार्यक्रममे वडा नम्बर २ वडा अध्यक्ष विकास चौधरी, वडा नम्बर ५ के वडा अध्यक्ष विष्णु प्रसाद चौधरी, प्रमुख प्रशासकीय अधिकृत विरबहादुर ऐर, कृषि शाखा प्रमुख मैया चौधरी, पशु शाखा प्रमुख सुर्य प्रसाद चौधरी, वडा सदस्य ओ समुहके सदस्यहुकनके सहभागिता रहल रहे । कार्यक्रम समुहके अध्यक्ष रविका चौधरीके अध्यक्षतामे हुइल रहे ।
