राज्यक हरेक निकायमे दलित समुदायके अर्थपूर्ण सहभागीतामे जोड
पहुरा समाचारदाता
धनगढी, २१ पुस । वर्तमान समयमे टमान क्षेत्रमे दलित समुदाय उप्पर हुइटी रहल जातीय विभेदके घटना, अन्याय अत्याचार ओ राज्यके हरेक निकायमे समानुपातिक प्रतिनिधित्व, सेवा सुविधामे पहुँच हुई नइसेकलप्रति दलित समुदायके नेता तथा अगुवाहुक्रे चिन्ता व्यक्त करले बटै ।
दलित गैरसरकारी संस्था महासंघ(डिएनएफ) से धनगढीमे आयोजना करल सुदूरपश्चिममे दलित समुदायके सवाल तथा समाधानके उपाय विषयक छलफल कार्यक्रममे उ विषयमे चिन्ता करल हुइट । कार्यक्रममे सहभागीहुक्रे बाजुरामे गर्भवती दलित महिला बलात्कारके घटनाके सम्वन्धमे प्रदेश सरकारके गम्भीर ध्यानाकर्षण करैटी दोषीहे कडा कार्वाही ओ पीडितहे उचित क्षतिपूर्तिके माग करल रहिट । वक्ताहुक्रे उ घटनाके पीडित न्याय मागेबेर बाजुरा जिल्ला प्रहरीके डिएसपी कबिन्द्र बोहरा दलित समुदायके हुइल कारण अभद्र व्यवहार करके पीडितहुकनहे उल्टे नियन्त्रणमे लेके थुनामे धारल आरोप लगैटी डिएसपी बोहराहे समेत छानविनके दायरमे नाने पर्ना ओ दोषी हुइलेसे कारवाही करे पर्ना बटैलै ।
कार्यक्रममे वक्ताहुक्रे छुवाछुत मुक्त प्रदेशके सुनिश्चतता, जातीय विभेद करुइयाहे कडा कारवाही, दलित सशक्तिकरण ऐनके कार्यान्वयन, राज्यके हरेक निकायमे समानुपातिक प्रतिनिधित्व ओ सेवा सुविधामे पहुँच समान पहुँच हुई पर्नामे जोड डेहल रहिट ।
कार्यक्रममे प्रदेशसभा सदस्य हिरा सार्की, नेपाली काग्रेसके नेता एंव पूर्व राज्यमन्त्री टेकबहादुर रैका, नेपाल दलित संघके केन्द्रीय उपाध्यक्ष छत्र वहादुर टेलर, दलित नेता कुमार सिह टेलर, नेपाल दलित संघके अध्यक्ष प्रेम विक, अछामके दलित नेता नैनसिह थलारी, दलित साहित्य सोपानके अध्यक्ष गणेश नेपाली, नेपाल राष्टिय दलित समाज कल्याण संघके अध्यक्ष चक्र विक लगायत मन्तव्य राखल रहिट ।
कार्यक्रम दलित गैरसरकारी संस्था महासंघके प्रदेश अध्यक्ष प्रेम विसीके अध्यक्षतामे सम्पन्न हुइल रहे । कलेसे संचालन प्रदेश सचिव चक्र नेपाली करल रहिट । कार्यक्रममे सहकार्य फेडो संस्थासे करल रहे ।
