धनगढीके छ लेन सडकमे साइकल लेन सुरु

पहुरा समाचारदाता
धनगढी, २१ पुस । कैलालीके धनगढीमे अलगे ‘साइकल लेन’ सञ्चालन हुइल बा । मोहनापुल–अत्तरिया ६ लेन सडक अन्तर्गत धनगढी क्षेत्रमे शनिच्चरसे अलगे ‘साइकल लेन’ सञ्चालन करल हो ।

कैलाली भन्सारसे धनगढी एयरपोर्ट गेटसमके सडकके दुनु ओर करके १४ किलोमिटर सडकमे धनगढी उपमहानगरपालिकासे ‘साइकल लेन’ निर्माण करके सञ्चालनमे नानल हो । धनगढी उपमहानगरपालिकासे गैल कार्तिकमे उ ‘साइकल लेन’ निर्माणके लाग ठेक्का सम्झौता करल रहे । कैलाली भन्सारसे एयरपोर्ट गेटसम ७ दशमलव १४ किलोमिटर दाँया ओ ७ दशमलव १४ किलोमिटर बाँया सडकके साइडमे ‘साइकल लेन’ निर्माण करल धनगढी उपमहानगरपालिका जनैले बा । साइकल लेन निर्माणके लाग धनगढी उपमहानगरपालिकासे विकास निर्माण सेवा बाँकेसँग ४४ लाख ९१ हजार चार सय २१ रुप्यामे साइकल लेन निर्माणके लाग ठेक्का सम्झौता करल रहे ।

निर्माणके कार्य निर्धारित समयमे सम्पन्न हुइलपाछे शनिच्चर धनगढी उपमहानगरपालिकाके नगर उपप्रमुख कन्दकलाकुमारी राना धनगढीके ट्राफिक चौराहमे हरियर झन्डा देखाके ‘साइकल लेनके उदघाटन करली । उपप्रमुख रानासे हरियर झण्डा देखाके साइकल लेनके उदघाटन करलपाछे धनगढीके नगर प्रमुख गोपाल हमालसहितके साइकल यात्री धनगढीके ट्राफिक चौराह हुइटी भन्सार ओ भन्सार हुइटी एयरपोर्ट मार्गसम साइकल चलैले रहिट ।