स्नेहाहे एसपीए रिडर्स च्यालेन्जके उपाधि
पहुरा समाचारदाता
धनगढी, २२ पुस । पठन संस्कृतिके विकास कैना उद्देश्यसे एसपीए कलेजसे आयोजना करल एसपीए रिडर्स च्यालेन्जके उपाधि स्नेहा गुप्ता जिटल बाटी ।
तीन महिना आपन पह्रल पुस्तक अध्ययन कैटी उ पुस्तकके समिक्षा प्रस्तुत करेबर स्नेहा प्रथम स्थान हासिल करल हुइटी । उहाँ नगद ५ हजारसहित प्रमाण पत्र पाइल रही ।
ओस्टके अपेक्षा उपाध्याय ओ सुशिल विष्ट क्रमशः द्वितीय ओ तृतीय स्थानमे हासिल करल रहिट । उपाध्याय ३ हजार ओ विष्ट दुई हजार सहित प्रमाणपत्र पाइल रहिट ।
सुदूरपश्चिम प्रज्ञा प्रतिष्ठानके उपकुलपति डा टीएन जोशीके बर्का पहुनाइलमे सम्पन्न कार्यक्रममे उप प्राध्यापक सिताराम भट्ट, प्रजापति नेगी, तुलसी शर्मा निर्णायकके भूमिका निर्वाह करल रहिट ।
पाठकसे आपनसँग रहल वा किनल जुनसुँके पुस्तक फेन पह्रटी ओकर समिक्षा लिख्टी प्रस्तुत करे फर्नार् कार्यक्रमके अवधारणा रहे ।
कार्यत्रमके बर्का पहुना तथा सुदूरपश्चिम प्रज्ञा प्रतिष्ठानका उपकुलपति डा टीएन जोशी निजी क्षेत्रसे आपन गर्विलो पहिचान बनाइल एसपिए कलेज विद्यार्थीनके बौद्धिक क्षमता बृद्धिके लाग अत्यन्त फरक ओ लावा कार्यक्रम कैटी आइल ओरसे आगामी दिनमे कलेजसँग सहकार्य कैटी आघे बह्रना इच्छुक रहल प्रतिबद्धता जनैलै ।
’एसपीएसे आयोजना करल रिर्डर्स च्यालेन्ज कार्यक्रममे भर्खर +२ ओ स्नातक पह्रटी रहल विद्यार्थीनके विलक्षण वाक् कला,पठन संस्कृतिप्रतिके अभिरूचि ओ तार्किक क्षमता डेखेबर गौरवके अनुभूति हुइल,’ उहाँ कहलै, ’निर्णायक मण्डल ओ ’अडेन्स’के शब्दवाणके कडा घेराहे छिचोल्दटी इ उमेरके बच्चानसे डेखाइल प्रस्तुति हमार नानी बाबूहुक्रे क्षमता नैहोके नैहो अवसर नैपाके पो पाछे रहल बाटै कि जैसिन लागल । रिडर्स च्यालेन्जमे अपेक्षा उपाध्याय ओ स्नेहा गुप्ताके गज्जबके उत्कृष्ट प्रस्तुतिसे मन प्रफुल्ल हुइल । कार्यक्रम निरन्तरता पाए । सहकार्य ओ प्रबर्द्धन कैना हम्रे फेन इच्छुक बाटी ।’ ओस्टके निर्णायक मध्येके एक उप प्राध्याक भट्ट कार्यक्रमसे विशिष्ट अनुभव हुइलप्रतिक्रिया डेलै ।
’निर्णायकके रुपमे विद्यार्थीनके प्रस्तुति अवलोकन करगैल, प्रश्नोत्तर पश्चात् क्षमतासे भ्याइटसम मूल्यांकन करगैल! महनि गज्जब लागल चाहि विद्यार्थीनके प्रस्तुति हो । विद्यार्थीनके प्रस्तुतिमे आत्मविश्वास, भाषाके निखार ओ अध्ययनके दायरा डेखके कायल हुइनु,’ उहाँ कहलै, ’हमार पाछेक पुस्ता, खास कैके छाईहुक्रे, विविध पुस्तक पह्रठै, मञ्चमे प्रस्तुत करठै, अनि श्रोतासे उठल जिज्ञासामे हाजिरजवाफके शैली प्रभावकारी शास्त्रार्थ करठै ।! र्याखर्याख्ती पर्ना प्रश्न फेन चातुर्यतापूर्वक जवाफ डेठै ।! इ स्तरके बच्चा पाछेक पुस्तामे डेखके बहुट प्रभावित हुइल बाटुँ ! ओइनके प्रस्तुतिमे आबके नेपालके ओजरार अनुहार डेख्नु! इ मेरके कार्यक्रम सुदूरपश्चिममे औरे रहल महिन जानकारी नैहो! युवा पुस्ताहे पठन संस्कृतिमे सक्रिय बनैना, ज्ञानउपर विमर्श कैना आयोजना करल इ मेरके कार्यक्रम हमार ठाउँके लाग युनिक् हो । एसपीएके क्याम्पस प्रमुख योगराज सर ओ कार्यक्रम संयोजक अपर्णा गुप्ता म्यामहे बधाई तथा शुभकामना ।’
क्याम्पस प्रमुख योगराज उपाध्याय कार्यक्रममे सहभागि सक्कु जनहनहे धन्यवाद ज्ञापन कैटी आगामी दिनमे फेन इ खालके कार्यक्रमहे निरन्तरता डेना बटैलै ।
‘राजाहे देशमे पुजजाइठ् कना विद्धानहे संसारमे पुजजाइठ् कना पुर्खाहुक्रनके कहाइ रहल बा,’ गौतम कहलै, ‘विद्धान, सभ्य, समझदार नागरिक उत्पादन कैना पठन संस्कृतिके विकास हुइना आवश्यक बा । उहे बातहे मध्यनजर कैटी हम्रे इ च्यालेन्ज घोषणा करल रही । हमार उद्देश्यमे कुछ हदसम सफल हुइल विश्वास लेले बाटी । अइना दिनमे फेन इ खाले कार्यक्रमहे निरन्तरता डेजैना बा ।’
