थारु लेहेंगा चाडपर्वमे सिमित हुइटा संरक्षण आवश्यक बाः गाउँपालिका उपाध्यक्ष

पहुरा समाचारदाता
हसुलिया, २२ पुस । कैलारी गाउँपालिका उपाध्यक्ष भगवतीकुमारी चौधरी थारु समुदायके महिलाहुक्रे घल्ना लेंहङगा चाडपर्वमे सिमित हुइटी गैल बटैले बटी ।

कैलारी गाउँपालिका वडा नम्बर २ मे गैल अगहन ५ गतेसे संचालन हुइल ४५ दिने निशुल्क लेहङगा सिल्ना तालिम समापन कार्यक्रमके वडका पहुना रहल गाउँपालिका उपाध्यक्ष उ बाट बत्वाइल रहिट । थारु समुदायके परम्परागत मौलिक पोशाक लोप हुइटी रहल ओरसे यकर संरक्षण ओ सम्वद्र्धन करेक लाग गाउँपालिकासे लेहंगा सिल्ना तालिम डेहल उहाँ बटैली ।
उहाँ कहली, ‘थारु पहिरन चाडपर्व, मेला, महोत्सव, उत्सव, स्वागत कार्यक्रम ओ समारोह केल सिमित हुइल बा, पौराणिक पोशाक लोप हुइटी गैल ओरसे संरक्षणसंगे व्यावसायिकरण करेक लाग तालिम डेहल हो ।

आधुनिक कटौटीडार लेहंगाके मोल १०÷१२ हजारसम पर्ना ओरसे यिही व्यावसायिकरण करे सेक्लेसे संस्कृति संरक्षण संगे आम्दानीके स्रोतफे बह्राई सेक्ना गाउँपालिका उपाध्यक्ष बटैली ।

तालिम समापन कार्यक्रम वडा नम्बर २ के वडा अध्यक्ष विकास चौधरीके अध्यक्षतामे हुइल रहे । कार्यक्रममे व्यवसायिक तथा सीप विकास तालिम केन्द्र धनगढी कैलालीके बसन्ती जोशी सीपके सदुपयोग करलेसे केल तालिम संचालन हुइलक सार्थकता पैना बटैली । कार्यक्रमके संचालन वडा सचिव हिरा ठकुल्ला करल रही ।

व्यवसायिक तथा सीप विकास तालिम केन्द्र धनगढी कैलाली ओ कैलारी गाउँपालिका २ नं.वडा कार्यालय उजलीसेमर कैलालीके सहकार्यमे निःशुल्क रुपमे सञ्चालित ४५ दिने (२२५ कार्यघण्टा) लेहेंगा सिल्ना तालिम हुइल हो ।

निशुल्क लेंहगा सिल्ना तालिममे २० जाने थारु समुदायके महिलाहुकनके सहभागिता रहल रहे । तालिमके प्रशिक्षण ओमकुमारी चौधरी रहल रही ।