कैलारीमे राष्ट्रपति रनिङ शिल्ड खेलकुद प्रतियोगिता सुरु

पहुरा समाचारदाता
हसुलिया, २३ पुस । कैलाली जिल्लाके कैलारी गाउँपालिका वडा नम्बर १ दिपेन्द्र माविमे सोम्मारके रोजसे राष्ट्रपति रनिङ शिल्ड खेलकुद प्रतियोगिता सुरु हुइल बा ।

कैलारी गाउँपालिका शिक्षा यूवा तथा खेलकुद शाखाके आयोजनामे हुइल प्रतियोगिताके गाउँपालिका अध्यक्ष राजसमझ चौधरी एक कार्यक्रमके विच उदघाटन करल रहिट । कार्यक्रममे उदघाटन कार्यक्रममे बोल्टी उहाँ विद्यार्थीहुकनहे शिक्षासंगे खेलकुदमे सहभागिता करैना आवश्यक रहल बटैलै ।

उहाँ कहलै, ‘खेलकुदसे विद्यार्थीनहे अनुशासित बनाइठ । जेकरमे अनुशासन बा, उ विद्यार्थी सहजुले अध्ययन पुरा करे सेक्ठै ।’ खेलकुदसे मुलुकहे राष्ट्रिय अन्तर्राष्ट्रियस्तरमे चिन्हैना काम करलफे गाउँपालिका अध्यक्ष बटैलै ।

कार्यक्रममे गाउँपालिका उपाध्यक्ष भगवतीकुमारी चौधरी खेलकुदके माध्यमसे विद्यार्थीनहे शारिरीक विकासमे टेवा पुगाइल बटैली । उहाँ कहली, ‘कौनो व्यक्तिके जटरा शिक्षा अनिवार्य हो । खेलकुदफे जरुरी हो । खेलकुदसे व्यक्तिके शारिरीक व्यायमहे सहयोग पुगाइठ ।’

सामाजिक विकास समिति संयोजक तथा वडा नम्बर ३ के वडा सन्तराम चौधरी खेलकुद क्षेत्रमे आघे रहल विद्यार्थी, व्यक्तित्व सरकारके सुरक्षा निकायमे सहजुल प्रवेश हुइना मौका मिल्ना बटैलै ।

कार्यक्रममे प्रमुख प्रशासकीय अधिकृत विरबहादुर ऐर, कैलारी गाउँपालिका शिक्षा यूवा तथा खेलकुद शाखा प्रमुख गणेश प्रसाद मिश्र, दिपेन्द्र माविके प्रअ विनोद भट्टराई, उ विद्यालयके शिक्षक नारायण ढकाल लगायत मन्तव्य व्यक्त करल रहिट । कार्यक्रमके संचालन कैलारी गाउँपालिका सामाजिक विकास शाखा प्रमुख यगम कलेल करल रहिट ।

प्रतियोगितामे गाउँपालिका भरिक सामुदायिक विद्यालयके अन्र्तगतके ९ ओ संस्थागत विद्यालयके चार मावि करके १३ विद्यालयके विद्यार्थीनके सहभागिता रहल बा । उदघाटनके पहिल रोज संयोजक विद्यालयके रुपमे रहल दिपेन्द्र माविके एनसीसी लगायतटमान गतिविधि, एथलेक्टिसके गतिविधि हुइल रहे ।

उदघाटन कार्यक्रममे कैलारी गाउँपालिकाके वडाके वडाध्यक्षहुक्रे, टमान शाखाके प्रमुख, कार्यपालिका सदस्य, वडा सदस्य, टमान विद्यालयके प्रअ तथा शिक्षक प्रतिनिधिहुकनके सहभागिता रहल रहे ।