नेपालमे कोरोनाके लावा ‘सबभेरियन्ट’
काठमाडौं, २३ पुस । नेपालमे कोरोना भाइरसके लावा भेरियन्ट जेएन डट वान पुष्टि हुइल बा ।
स्वास्थ्य तथा जनसङ्ख्या मन्त्रालयके प्रवक्ता डा. प्रकाश बुढाथोकी जिन सिक्वेन्सिङ करेबर नेपालमे पहिलचो कोरोनाके लावा भेरियन्ट जेएन डट वान पुष्टि हुइल जानकारी डेलै ।
राष्ट्रिय जनस्वास्थ्य प्रयोगशालामे १६ ठो एन्टिजेन पोजेटिभ नमुनाके जिन सिक्वेन्सिङ करेबर नेपालमे सातठो नमुनामे कोरोनाके लावा भेरिएन्ट जेएन डट वान पुष्टि हुइल हो ।
कोभिडके लावा सब भेरियन्ट ‘जेएन डट वान’ पाछेक एक महिनायहोर विश्वभर तीव्र रूपमे फैलटी रहल बा ।
डा.प्रकाश बुढाथोकी कोरोना सङ्क्रमण फैले नैडेना भिडभाडमे मास्कके प्रयोग, भौतिक दूरी कायम रख्नाके साथे हाठके सरसफाइमे समेत विशेषतः ध्यान डेना आग्रह करले बाटै ।
मन्त्रालयसे लावा सब भेरिएन्टके बह्रटी रहल सङ्क्रमणहे मध्यनजर कैटी नेपाल प्रवेश बिन्दुमे सम्पूर्ण हेल्थ डेक्स, स्वास्थ्य कार्यालयमार्फत आवश्यक स्क्रीनिङ ओ निगरानी निरन्तर कैनाके साथे स्वास्थ्य सेवा प्रदान कैना स्वास्थ्य संस्थाहे स्वास्थ्य उपचार व्यवस्थापनके तयारी अवस्थामे रहना अनुरोध करल बा ।
