महिलाहुकन व्यावसायिक बनैना सिलाई कटाई तह–२ के तालिम सुरु

पहुरा समाचारदाता
हसुलिया, २४ पुस । कैलारी गाउँपालिका वडा नम्बर ५ मे सीप तथा व्यावसायिक विकास कार्यक्रम अन्र्तगत तह–२ के सिलाई कटाई सम्बन्धी तालिम सुरु हुइल बा ।

कैलारी गाउँपालिका महिला तथा बालबालिका शाखाके आयोजनामे पहिल लेवल लेसेक्ल महिलाहुकनके लाग सुरु हुइल तालिम गाउँपालिका उपाध्यक्ष भगवती कुमारी चौधरीके वडका पहुनामे उदघाटन कार्यक्रम हुइल बा । उदघाटन कार्यक्रममे बोल्टी गाउँपालिका उपाध्यक्ष महिलाहुकन उद्यमी बनाइलक लाग यी तालिम डेहल बटैली ।

उहाँ कहली, ‘तह–१ लेसेकल महिला अपन घल्ना लुगरासम सिए जन्ठै । तह–२ लेसेकलपाछे व्यवसाय करे सेक्ही ।’
तह–१ लेहल महिला ढेर रहल ओरसे कोई व्यावसायिक ढंगके आघे बह्रना चाहलेसे तह–२ के तालिममे ओइनहेफे सहभागी कराई सेक्ना गाउँपालिका उपाध्यक्ष बटैली ।

सामाजिक विकास समिति संयोजक तथा वडा नम्बर ३ वडा अध्यक्ष सन्तराम चौधरी पहिले सिलाई कटाईमे गैरथारुनके केल उपस्थिति रहल मने अब्बे थारु समुदायके व्यक्तिन सिलाई कटाई लगायत टमान व्यवसायमे आघे डेखल बटैलै ।

कार्यक्रममे वडा नम्बर ५ के कार्यवाहक अध्यक्ष भागुदास चौधरी, तालिमके प्रशिक्षक चम्फा बोहरा लगायत मन्तव्य व्यक्त करल रहिट ।

उदघाटन कार्यक्रमके संचालन कैलारी गाउँपालिका महिला तथा बालबालिका शाखा प्रमुख बालकुमारी चौधरी करल रही । तालिममे ६० दिन चल्ना बा कलेसे यम्ने २७ जाने सहभागी रहल बटै । तालिममे सहभागीहुकन तालिम अवधि भर चाहल सामाग्री महिला तथा बालबालिका शाखासे उपलब्ध करैना जनागिल बा ।