सहकारीके कर्मचारीनहे सूचना व्यवस्थापन तालिम

पहुरा समाचारदाता
हसुलिया, २४ पुस । महिला सहकारी संस्थाके कर्मचारीहुकनके क्षमता विकास कार्यक्रम अन्र्तगत सहकारी तथा गरिबी सम्बन्धी सूचना व्यवस्थापन प्रणाली (कोपोमिस) सम्बन्धी तीन दिने तालिम हसुलियामे सुरु हुइल बा ।

कैलारी गाउँपालिका महिला तथा बालबालिका शाखाके आयोजनामे हुइटी तालिम उदघाटन गाउँपालिका उपाध्यक्ष भगवतीकुमारी चौधरीके वडका पहुनामे हुइल रहे । उहाँ व्यानर पह्रके तालिमके उदघाटन करल रहिट । कार्यक्रममे बोल्टी उहाँ अब्बे सूचनाके प्रविधिके यूग आइल ओरसे यकर जानकार हुइना आवश्यक रहल बटैली । उहाँ कहली,‘जे सूचना प्रविधिमे आघे बा । सूचना प्रविधिके पहुँच रहल देश आघे बह्रल बा ।’

तालिम उदघाटन कार्यक्रम सामाजिक विकास समिति संयोजक तथा वडा नम्बर ३ के वडा अध्यक्ष सन्तराम चौधरीके अध्यक्षतामे हुइल रहे । तालिम उदघाटन कार्यक्रम संचालन कैलारी गाउँपालिका महिला तथा बालबालिका शाखा प्रमुख बालकुमारी चौधरी करल रहिट । कलेसे तीन दिनसम संचालन रना तालिममे प्रशिक्षण दिनेशकुमार बोहरा डेटी रहल बटै । तालिममे कैलारी गाउँपालिकाभिटर टमान सहकारीके कर्मचारीहुकनके सहभागिता रहल बा ।