धनगढीमे भुवा महोत्सव सुरु

पहुरा समाचारदाता
धनगढी, २६ पुस । धनगढीमे भुवा महोत्सव सुरु हुइल बा । महोत्सवके बिफेक रोज सुदूरपश्चिम प्रदेशके प्रदेश प्रमुख देवराज जोशी उदघाटन करल हुइट । धनगढी रङगशालामे हुइल महोत्सवमे बाजुरा ओ बझाङ घर रहल हाल धनगढीमे बसोबास करुइया अपन भुवा चाली प्रस्तुत करल रहिट । सुदूरपश्चिम खेलकुद परिषद् धनगढीके मुख्य प्रवद्र्धक रहल महोत्सवमे कैलाली ओ कञ्चनपुरके भुवा खेल खेल्न ६ टिमके सहभागिता रहल बा ।

बाजुरेली समाजसे आयोजना करल कार्यक्रममे सुदूरपश्चिम प्रदेशके आर्थिक मामिला तथा योजना मन्त्री नरेश शाही, सांसद पदम शाही, सन्तोष शर्मा थापा, सुदूरपश्चिम खेलकुद परिषद्के सदस्य सचिव विरेन्द्रबहादुर सिंह अपन धारणा व्यक्त करल रहिट ।
सुदूरपश्चिम प्रदेश सरकारसे विफेक रोज प्रदेशभर सार्वजनिक विदा डेहल रहे । पहाडी जिल्लासे तराई झरल, बाजुरेली, बझाङगीहुक्रे यहाँफे भुवा पर्व मनैना करल बटै । सार्वजनिक स्थानमे भुवा नाँच नाँचके यी पर्वमे रमैना चलन रहल बा । समाजके अध्यक्ष वजिरसिंह धामीके अध्यक्षतामे हुइल कार्यक्रममे टमान कलाकार अपन प्रस्तुति राखल रहिट ।

दशिया डेवारी पाछेक दुसरा भारी पर्वके रुपमे मनैना भुवा पर्व बिफेसे विधिवत् रुपमे सुरु हुइल हो । महाभारतके युद्धके पाण्डव ओ कौरव बीचके गाथामे आधारित भुवा पर्वहे स्थानीयसे भस्सो पर्वफे कहठै । पौराणिक कालमे कौरवउप्पर पाण्डवसे विजय प्राप्त करल दिनके सम्झनामे यी पर्व मनैना करल जनविश्वास बा । भुवा पर्व पुषे औँसीके दिनसे सुरु हुके तीनसे पाँच दिनसम मनैना करजाइठ ।

आफन्तसँगके भेटघाट, आपसी सद्भाव,रमाइलो ओ सत्यके जीत तथा महाभारतके युद्धहे केन्द्र भागमे धारके भुवा अवधिभर रमाइलो कैना करजाइठ । भुवा पर्वमे हरिनु डर्ना ओ ओकर गाथा गैना तथा ढाल ओ तरबारसहित भुवा चाली खेल्न, लाखे नाच नांच्न, साँझके देउडा खेलके रमाइलो कैना प्रचलन बा । सत्यके जितसँग यी पर्वहे जोरल ओरसे सत्यके पक्षपाती भुवा पर्व मनैना करल भुवा पर्वके जानकारहुक्रे बटैना करल बटै ।