विपद जोखिम न्यूनीकरणबारे सचेतना आवश्यकः गाउँपालिका अध्यक्ष
पहुरा समाचारदाता
हसुलिया, २८ पुस । कैलारी गाउँपालिकाके अध्यक्ष राजसमझ चौधरी विपद जोखिम न्यूनिकरणबारे सचेतना आवश्यक रहल बटैले बटै ।
बहुउद्देश्यीय विकास समाज डडेल्धुराके आयोजनामे विपद टास्क फोर्स ओ स्थानीय समुदायके अगुवाहुकनके लाग विपद व्यवस्थापन तथा पूर्व सूचना प्रणाली सम्बन्धी अभिमुखीकरण कार्यक्रमके उदघाटन कार्यक्रममे बोल्टी उ बाट बत्वाइल रहिट । उहाँ कहलै, ‘विपद दुई मेरिक रहठ, एक ठो प्राकृतिक विपद ओ दुसर मानविय गतिविधिसे सृर्जित । यी बारे आम नागरिक जानकारी पैना जरुरी बा । कतिपय मानविय गतिविधिके कारण विपद अइना करठ, ओ प्राकतिक विपद विना जानकारी आइठ । उहीसे बाँचेक लाग पूर्व तयारी आवश्यक रहठ ।’
कैलारी गाउँपालिकाके टमान वडा डुबानसंगे आगलागीके जोखिम रहलफे गाउँपालिका अध्यक्ष बटैलै । उहाँ कहलै, लडिया तटिया क्षेत्रसे जोरल वडामे डुबानके समस्या बा, कलेसे बनजंगलसे जोरल वडामे आगलागीके जोखिम रहल बा । कैलारी–७ के विपत बस्ती आगलागीसे गाउँ ध्वस्त हुइल रहे ।’
उहाँ विपद जोखिम न्यूनीकरणके क्षेत्रमे समुदायमे सचेतना अभिवृद्धि कैना कार्यमे बहुउद्देश्यीय विकास समाजसे खेलल भूमिकाके प्रशंसा करटी धन्यवादफे ज्ञापन करलै ।
कार्यक्रममे कैलारी गाउँपालिका वडा न ३ के अध्यक्ष सन्तराम चौधरी टास्क फोर्सके क्षमता अभिवृद्घि, सक्रिया ओ परिचालनमे अपनेहुक्रेफे सहयोग कैना बटैलै । कार्यक्रममे वडा नं ४ के अध्यक्ष एंव विपद संयोजक ठागुराम चौधरी, कार्यपालिका सदस्य लाल बहादुर बिक,भलमन्सा रामकिसन चौधरी लगायत मन्तव्य रख्ले रहिट ।
बाढ तथा डुबान प्रभावित क्षेत्रमे स्थानीय श्रोत साधनके प्रयोग मार्फत विपत जोखिम न्यूनीकरणमे समुदायके ज्ञान सीप ओ क्षमता अभिवृद्धि करके ओइनहे परिचालन कैना उद्देश्यसे उ अभिमुखीकरण करल सुर्मिनालाके भलमन्सा रामकिसन चौधरी जानकारी डेलै ।
कैलारी गाउँपालिकाके समन्वय, केर्क इन एक्ट कार्डिएडके सहयोगमे बहुउद्देश्यीय विकास समाज डडेलधुरासे संचालित बाढी पहिरोके उच्च जोखिमके पूर्व तयारी तथा प्रतिकार्य परियोजना अन्तर्गत उ कार्यक्रमके आयोजना करल हो । कार्यक्रमके सहजीकरण बहुउद्देश्यीय विकास समाजके डिआरआर टेक्निकल एक्सपर्ट राजेन्द्र रैका ओ सामाजिक परिचालक सर्मिला चौधरी करल रहिट ।
