माघ मिलन कार्यक्रम मनागिल
पहुरा समाचारदाता
धनगढी, २८ पुस । थारु समुदायके वर्का टिहुवार माघ टिहुवारके अवसरमे धनगढी उपमहानगरपालिका–१४ सि गाउँमे माघ मिलन कार्यक्रम कैगिल बा ।
थारु समाज सि गाउँ ओ थारु लेखक संघ नेपालके संयुक्त आयोजनामे मनागिल माघ मिलन कार्यक्रममे वर्का पहुुना सुदूरपश्चिम प्रदेश सरकारके उपसभामुख कोइलीदेवी चौधरी रहल रहिट । कार्यक्रममे सम्बोधन करटी उहाँ थारु समुदायके परम्परागत संस्कृतिहे विस्राई नइहुइना बटैली । समय परिवर्तन हुइल अनुसार कला, संस्कृतिफे परिमार्जित हु्इटी गैल ओरसे पौराणिक संस्कृतिहे लिपि कैना जरुरी रहल बटैली । थारु समुदायके वर्का टिहुवार माघ पर्व गैरथारु समुदायसे मनैटी रहल ओरसे सामाजिक सदभाव ओ एकता हुइटी गैलफे उपसभामुख चौधरी बटैली ।
कार्यक्रमके विशिष्ट पहुना प्रदेशसभा सदस्य धर्मराज पाठक, धनगढी उपमहानगरपालिकाके उपप्रमुख कन्दकला राना थारु समुदायके अलग संस्कृति पहिचान रहल ओरसे यी संस्कृति हमार प्रदेशमे विविधता रहल बटैलै । थारु लगायत प्रदेशभिटर टमान कला, संस्कृति रहल ओरसे यी हमार सम्पति रहलफे बटैलै ।
कार्यक्रममे पूर्व प्रदेशसभा सदस्य तथा राज्यमन्त्री शुसिला बुढाथोकी, पूर्व प्रदेशसभा सदस्य नेपालु चौधरी, धनगढी उपमहानगरपालिका वडा नम्बर १४ के वडा अध्यक्ष मानबहादुर विष्ट, वडा नम्बर १८ के वडा अध्यक्ष भुवन रिजाल, वडा–१४ के निवर्तमान वडा अध्यक्ष रामबजारी थारु, वडा–१४ के वडा सदस्य रमेश चौधरी, कल्गी बचत तथा ऋण सहकारी संस्था लिमिडेडके अध्यक्ष रामचन्द्र चौधरी, सिद्धबाबा आविके अध्यक्ष महेश गोले, सर्वोदय माविके अध्यक्ष जगदीश चौधरी, बैवाह टोलके भल्मन्सा चन्द्रलाल चौधरीलगायत मन्तव्य व्यक्त करल रहिट ।
सि गाउँ टोल भल्मन्सा विफराम चौधरीके अध्यक्षतामे हुइल कार्यक्रमके संचालन पार्वती चौधरी ओ रघुनाथ चौधरी करल रहिट । स्वागत नाथुराम चाौधरी करल रहिट । माघ मिलन कार्यक्रमके प्रवद्र्धकमे सुदूरपश्चिम प्रदेश प्रज्ञा प्रतिष्ठान कैलाली, सह प्रयोजकमे नवजीवन सहकारी धनगढी, प्रयोजकमे निसर्ग अस्पताल, मुख्य प्रयोजकमे धनगढी–१४ के कार्यालय रहल बा ।
कार्यक्रममे टमान टोल ओ समुहके सांस्कृति नाँच ओ गायक दर्पण कुशुम्या, उमेश मुस्कान, ईश्वर ओझा, मोडल रितु चौधरी, भावना चौधरी, आयशा चौधरी, राजिव सुनारलगायतके बेजोड प्रस्तुती रहे ।
