राष्ट्रिय सभा सदस्य उम्मेदवार साढे तीन लाखके खर्च करे पैना

पहुरा समाचारदाता
धनगढी, २९ पुस । यिहे अइना माघ ११ गते हुइना राष्ट्रिय सभा सदस्य निर्वाचनमे उम्मेदवारसे तीन लाख ५० हजारकेल खर्च करे पैना आयोग जनैले बा । आयोगसे एक विज्ञप्ती जारी करटी उम्मेदवारसे करे पैना निर्वाचन खर्चके हद तोकल हो ।

राष्ट्रिय सभा सदस्य निर्वाचनके उम्मेदवारसे राष्ट्रिय सभा सदस्य निर्वाचन ऐन, २०७५ के दफा ६५ तथा राष्ट्रिय सभा सदस्य निर्वाचन नियमावली,२०७६ के नियम ४६(१) सँग सम्बन्धित अनुसूची–१ से रु.३ लाख ५० पचास हजार केल खर्च करे सेक्ना करके हद तोकल बा । उ खर्च मतदाता नामावली खरिद, सवारी साधन, सवारी सधानके इन्धन, प्रचार प्रसार सामग्री, ढुवानी, गोष्ठी, अन्तरक्रिया, प्रचार प्रसार, कार्यालय सञ्चालन, प्रतिनिधि परिचालन ओ विविध शीर्षकमे करे सेक्ना बा ।

उम्मेदवारसे खर्च करेबेर बैंक वा वित्तीय संस्थामे अलगे खाता खोल्के उहे खातासे खर्च कैना ओ यैसिक खर्च करेबेर ओइनके ओरसे खर्च कैना जिम्मेवार पदाधिकारी तोक्के ओइनके नाम नामेसीसहितके विवरण निर्वाचन अधिकृतके कार्यालय तथा निर्वाचन कार्यालयमे जानकारी करैना आयोग निर्देश करले बा ।

ओस्टेक करके निर्वाचन खर्चके विवरण निर्वाचन सम्पन्न हुइलपाछे सार्वजनिक करके राष्ट्रिय सभा सदस्य निर्वाचन ऐन, २०७५ के दफा ६५ तथा निर्वाचन (कसूर तथा सजाय) ऐन, २०७३ के दफा ३१ बमोजिम निर्वाचन परिणाम घोषणा हुइल तीस दिनभिटर आयोग वा निर्वाचन कार्यालयमे पेश कैना समेत आयोग निर्देश करले बा ।