धनगढीमे ग्रासरुट क्रिकेट विकास कार्यक्रम सञ्चालन हुइना

पहुरा समाचारदाता
धनगढी, ६ माघ । क्रिकेटके शहर धनगढीमे ग्रासरुट क्रिकेट विकास कार्यक्रम सञ्चालन हुइना बा ।

धनगढी उपमहानगरपालिकासंगके साझेदारीमे गो ड्रिमर्ससे उपमहानगरपालिकामे उ कार्यक्रम सञ्चालन करे लागल हो । उपमहानगरपालिकाके मेयर गोपाल हमाल ओ गो ड्रिमर्सके अध्यक्ष सुवास शाही शुकके समझदारी पत्रमे हस्ताक्षर करलै । दुनु पक्षबीच उपमहानगरपालिकाके दुई नमूना स्कुलमे ग्रासरुट लेभल क्रिकेट कार्यक्रम सञ्चालन कैना समझदारी हुइल हो ।
नगरप्रमुख शैक्षिक गुणस्तर सुधार कार्यक्रमअन्तर्गत छनौटमे परल धनगढी वडानम्बर १२ स्थित सिद्धनाथ मावि, जुगेडा ओ धनगढी वडानम्बर १८ स्थित चन्द्रोदय मावि, फुलबारीमे उ कार्यक्रम लागु हुइना बा ।

नगरप्रमुख गोपाल हमाल नमूना विद्यालयमे क्रिकेटके नर्सरी विकास करेक लाग यी कार्यक्रम महत्वपूर्ण हुइना विश्वास व्यक्त करलै । ‘नयाँ प्रतिभाहे उत्पादन कैना उदेश्यके साथ हम्रे विगतसे धनगढीहे क्रिकेटके शहरके रुपमे स्थापित कैना अग्रसर हुइटी रहल सुवाश शाहीके टिमसँग क्रिकेट विकास कार्यक्रमके सम्झौता करल बटी । यी नमूना स्कुलमे क्रिकेटके नर्सरी तयार कैना समझदारी हो । क्रमिक रुपमे अन्य विद्यालयमे यी कार्यक्रम लागु करटी जैबी । यी कार्यक्रमसे धनगढीहे क्रिकेटके शहरके रुपमे स्थापित कैना अभियानहे मुर्तरुप डेना विश्वास लेहल बटी,’ हमाल कहलै ।

गो ड्रिमर्सके अध्यक्ष सुवाश शाही अन्तर्राष्ट्रियस्तरके खेलाडी उत्पादन कैना लक्ष्यसहित यी कार्यक्रम सुरु करल बटैलै ।
‘ग्रासरुट लेभल क्रिकेट विकास कार्यक्रमके प्रस्तावहे स्वीकरटी साझेदारीके हात आघे बढैना धनगढी उपमहानगरपालिका ओ नगरप्रमुख गोपाल हमालहे विशेष धन्यवाद डेहे चाहटु । नेपाली क्रिकेटके विकासके लाग स्थानीय तहसंगके सहकार्यमे हुई लागल यी कार्यक्रम मोडेलके रुपमे स्थापित हुइल बा । भविष्यमे नेपालसे अन्तर्राष्ट्रिय खेल्न खेलाडी उत्पादन कैना लक्ष्य लेहल यी कार्यक्रमके प्रभावकारी कार्यान्वयन कैना प्रतिबद्धता जनाई चाहठी,’ शाही कहलै ।

धनगढीहे क्रिकेटके शहरके रुपमे स्थापित कैना गो ड्रिमर्सके टिमसे विगतसे धनगढी क्रिकेट लिग हुइटी धनगढी प्रिमियर लिगसमके व्यवसायिक क्रिकेट प्रतियोगिता, नेपालमे पहिल चो क्रिकेट खेलाडीके अक्सन, धनगढी एफसीहे लगातार दुई चो नेपाल सुपर लिगके उपविजेता बनासेकल गो ड्रिमर्ससे धनगढीहे ग्लोबल सिटीके रुपमे विकास कैना निरन्तर भूमिका निर्वाह करटी रहल बा ।

उपमहानगरपालिकासँग हुइल ग्रासरुट लेभलके क्रिकेट विकास कार्यक्रम टमान प्रतिभावान खेलाडी रहल सुदूरपश्चिम प्रदेशके लाग वरदान सावित हुइना विश्वास लेहल शाही बटैलै । यी कार्यक्रममे सामुदायिक विद्यार्थीहुकनहे क्रिकेटके आधारभूत बाट सिखैना ओइनके क्षमता अभिवृद्धि कैना, खेलप्रतिके लगाव बढैना महत्वपूर्ण भूमिका निर्वाह कैबी । समझदारी अुनसार दुई विद्यालयमे क्रिकेटके आधारभूत संरचनाके विकास करटी क्रिकेट प्रशिक्षकके व्यवस्था करके नियमित प्रशिक्षण डेहुवइना बा ।