१८ किसानहे सिचाई बोरिङ वितरण
पहुरा समाचारदाता
हसुलिया, ८ माघ । कैलाली जिल्लाके कैलारी गाउँपालिका वडा नम्बर ३ ओ ४ के किसानहे सिचाई बोरिङ वितरण करल बा ।
सहास नेपाल ओ कैलारी गाउँपालिकाके संयूक्त साझेदारीमे १८ जाने किसानहे सिचाई बोरिङ वितरण करल हो । गाउँपालिका अध्यक्ष राजसमझ चौधरीके वडका पहुनामे हुइल एक कार्यक्रमके विच सिचाई सुविधा नइरहल किसानहे बोरिङ वितरण करल हो ।
बोरिङ वितरण कार्यक्रममे बोल्टी गाउँपालिका अध्यक्ष वडा नम्बर ४ मे सुकुम्बासी, दलित, मुक्तकमैया बसोबास रहल वडा हो । यहाँके किसानके जग्गाफे रहल ओम्नेफे सिचाई सुविधा नइरहल ओरसे बोरिङ वितरण करल बटैलै ।
गाउँपालिकासे बगरखेतीके अवधारण नानके सपोट करल मने किसान ओहोर ओर ध्यान नइडेहल बटैलै । यहाँ उत्पादन हुइल टिना बाहै्र महिना नइपुग्ना हुइल ओरसे आब व्यावसायिक रुपमे जैना जरुरी रहल बटैलै । सहास नेपालसे कैलारीके विकासमे साझेदारी करडेहलमे उहाँ धन्यवाद डेटी सहकार्य जारी रहना बटैलै ।
सहास नेपालके कार्यकारी निर्देशक डा. सुरेन्द्रकुमार श्रेष्ठ अपनेहुक्रे स्रोत साझेदारीमे किसानहे बोरिङ वितरण करल बटैलै । कैलारी कुछ वडामे परियोजना संचालन करके विपन्न समुदायहे सपोट करटी आइलमे अइना दिनमे सक्कु वडामे कार्यक्रम संचालन कैना प्रतिवद्धता जनैलै । सिचाईके् लाग १८ ठो बोरिङके लाग सहास नेपालसे ८ लाख २६ हजार ५९ रुपैया ओ कैलारी गाउँपालिकासे ३ लाख ५० हजार आर्थिक सहयोग प्रदान करले बा ।
कैलारी गाउँपालिका वडा नम्बर ४ के वडा अध्यक्ष ठागुराम चौधरीके अध्यक्षतामे हुइल कार्यक्रममे उहाँ गैल बर्षफे किसानहे सिचाई बोरिङ वितरण करल ओ यी वर्षफे सहास नेपालके सहयोग साझेदारीमे निरन्तरता डेहल बटैलै । वडा नम्बर ४ मे सिचाईके लाग कुलुवा नइलग्ना हुइल ओरसे बोरिङ वितरण करल बटैलै । वडा नम्बर ४ के लाग १२ ठो ओ वडा नम्बर ३ के लाग ६ ठो बोरिङ वितरण करल हो ।
कार्यक्रम संचालन सहास नेपालके कार्यक्रम संयोजक नरेश चौधरी करल रहिट । उ कार्यक्रममे वडा नम्बर ३ के अध्यक्ष सन्तराम चौधरी, प्रमुख प्रशासकीय अधिकृत विरबहादुर ऐर, वडा नम्बर ४ के वडा सदस्य, कार्यपालिका सदस्यलगायत सहास नेपालके प्रतिनिधिहुकनके सहभागिता रहल रहे ।
