मेलमिलाप केन्द्रहे कार्यालय व्यवस्थापन सामाग्री हस्तान्तरण

पहुरा समाचारदाता
हसुलिया, ९ माघ । कैलारी गाउँपालिकाके न्यायिक समितिसे वडामे रहल मेलमिलाप केन्द्रहे कार्यालय व्यवस्थापन सामाग्री हस्तान्तरण कैगिल बा ।

कैलारी गाउँपालिकाके न्यायिक समिति संयोजक भगवतीकुमारी चौधरी वडा नम्बर ८ के मेलमिलाप केन्द्रके संयोजक रामचरण चौधरीहे कार्यालय व्यवस्थापन सामाग्री हस्तान्तरण करल रहिट । मेलमिलाप केन्द्र कार्यालय व्यवस्थापनके लाग न्यायिक समितिसे एक ठो टेबुल ओ पाँच ठो कुर्सी, मेलमिलाप केन्द्रके सदस्यहु्कन परिचयपत्र व्यवस्था करल बा ।

न्यायिक समितिसे मंगरके रोज वडा नम्बर ६, ८ ओ ९ मे रहल मेलमिलाप केन्द्रहे उ सामाग्री हस्तान्तरण करल बा कलेसे बाँकी वडामे रहल मेलमिलाप केन्द्रहेफे उ सामाग्री हस्तान्तरण कैजिना जनागिल बा ।