कैलारीमे विद्यालय पोषणमे स्थानीय खाना समावेश

पहुरा समाचारदाता
हसुलिया, १० माघ । कैलारी गाउँपालिका स्तरीय विद्यालय पोषण कार्यक्रमके समिक्षा तथा अभिमुखीकरण कार्यक्रम हुइल बा ।

कैलारी गाउँपालिकाके आयोजनामे हुइल कार्यक्रममे गाउँपालिका अध्यक्ष राजसमझ चौधरी विद्यालयमे डेना खाजामे स्थानीय खाना समावेश करल बटैलै । उहाँ पालिकाभिटरके तटकाल ३० विद्यालयमे भान्सा घरके आवधारण नानके कार्यक्रम आघे बह्रइल बटैलै ।

विद्यालयमे जङकफुड खाइलक कारण विद्यार्थीके स्वास्थ्यमे नइमजा असर परटी गैल बा,’ गाउँपालिका अध्यक्ष कहलै, ‘जंङकफुडसे बच्चनहे बचाइक लाग स्थानीय खाना समावेश करले बटी । उहीसे बालबालिकाके स्वास्थ्य मजा हुई कलेसे स्थानीय उत्पादनहे बजार पैले बा ।’

गाउँपालिकाभिटरके सामुदायिक ओ संस्थागत विद्यालयहे ढेर कार्यक्रममे समावेश करजैटी बा । कोई पालिकाके निर्णय विपरित जाई कलेसे कर्वाही कैना उहाँ बटैलै ।

कैलारी गाउँपालिका सीमासंग जोरल कारण लागु औषधमे फस्टी गैल बटै । उहीहे नियन्त्रण करेक लाग सक्कु जाने अहम भूमिका खेल्ना उहाँ आग्रह करलै । स्वास्थ्य विमा करुइयाके संख्याफे कम रहल ओरसे ओहोरफे भूमिका निर्वाह कैना शिक्षकहुकनसे आग्रह करलै ।

कार्यक्रममे प्रमुख प्रशासकीय अधिकृत विरबहादुर ऐर विद्यालयके पोषण कार्यक्रम संगे बालिकाहुकनहे आइरन चक्की आवश्यक रहल बटैलै । उहाँ कहलै, बालबालिकाके पोषण आवश्यक बा । बालिकाके महिनावारी हुईबेर ढेर रगत बहना कारण रक्तअल्पता हुई सेकठ । उहीहे स्वास्थ्यमे नइमजा असर परठ ।’

पोषणयूक्त खानासे शारिरीक संग्गे बौद्धिक विकास हुई विद्यालय केल नाही घरपरिवारफे ढेर ध्यार डेना यकर आवश्यकता बा ।

कैलारी गाउँपालिकासे विद्यालय दिवा खाजामे खिर भात, हलुवा, चना, अण्डा, स्थानीय उत्पादनमे आधारित टिना भात, हप्तामे एक दिन मासु भात, फलफुल डेटी आइल शिक्षा शाखा प्रमुख गणेश प्रसाद मिश्र बटैलै ।

सुपोषित विद्यार्थीके सिकाई मजा रना, विद्यालय नइछोरना ओ बौद्धिक विकास हुइठ,’उहाँ कहलै ‘औपचरिक रुपमे शिक्षा परले बा, अनौपचरिक रुपमे यी गतिविधि आवश्यक बा ।

कार्यक्रममे कैलारी गाउँपालिकाके स्वास्थ्य शाखा प्रमुख नरेश चौधरी पोषणके अवस्था ओ रक्तअल्पता रोकथामके लाग किशोरीहुकनहे आइरन तथा फोलिक एसिड वितरण कार्यक्रमबारे प्रस्तुतीकरण करल रहिट । उहाँ कहलै, ‘आइरन तथा फोलिक एसिडके कमीसे बालिकामे रक्तअल्पता हुइना करठ । उहीहे रोकथामके लाग गाउँपालिकासे हरेक विद्यालयमे महिनावारी हुइना उमेरके किशोरीहुकनहे आइरन तथा फोलिक एसिड वितरण कार्यक्रम संचालन करटी आइल बा ।
ओस्टेक करके करुणा चौधरीफे पोषणके अवस्था ओ आइरन तथा फोलिक एसिडके कमीसे हुइना असरबारे प्रस्तुतीकरण करल रहिट ।

कार्यक्रममे गाउँपालिका उपाध्यक्ष भगवतीकुमारी चौधरी, वडा नम्बर ३ वडा अध्यक्ष सन्तराम चौधरी, पालिकाभरिक सक्कु विद्यालयके आइरन तथा फोलिक एसिड वितरण कार्यक्रम फोकल पर्सन, पालिकाके स्वास्थ्य संस्थाके प्रमुख, प्रतिनिधिहुकनहे सहभागिता रहे ।