मजगाउँमे माघ महोत्सव सुरु

पहुरा समाचारदाता
धनगढी, १२ माघ । थारू समुदायके हेरैटी गैलक लोककला, रिती संस्कृति, संरक्षण सर्म्बद्धन ओ पहिचान बचाइक लाग गोदावरी नगरपालिका वडा नम्बर ८ मजगाउँमे शुकके माघ महोत्सव सुरु बा ।

थारू कल्याणकारिणी सभा गोदावरी नगरसमिति ओ बरघर भलमन्सा नगरसमितिके आयोजनामे माघ १२, १३ ओ १४ गते हुइना महोत्सव सुदूरपश्चिम प्रदेश सरकारके भुमि व्यवस्था तथा कृषि सहकारी मन्त्री रामेश्वर चौधरी निसराउ काँहरके के उदघाटन करल रहिट ।

महोत्सव उदघाटनके वरका पहुना रहल मन्त्री चौधरी सम्बोधन कैटी माघ महोत्सवसे थारु समुदायके संस्कृति संरक्षणमे टेवा पुगल बटैले बटै । उहाँ कहलै, ॅयुवा पुस्ताहे परम्परगत कला, संस्कृतिक ज्ञान नइहुइना । समय परिवर्तनसँगे आधुनिक गितबाँस अइटी बा । महोत्सवसे थारू समुदायके हेरैटी गैलक लोककला, रिती संस्कृति, संरक्षण सर्म्बद्धन ओ पहिचान जोगैनामे सहयोग पुगल बा ।’

परम्परागत मांगर, धमारलगायत समयअनुसार गाजैनाफे गीतबाँस हेरटीगैल कहटी दस्तावेजीकरण कैना जरुरी रहलफे मन्क्री चौधरी बटैलै ।

कार्यत्रमके विशिष्ट पहुना रहल थारु कल्याणकारिणी सभाके केन्द्रीय सदस्य इन्दु चौधरी थारु समुदायके संस्कृति उप्पर प्रहार हुइटी गैल बटैली । उहाँ कहली, ॅहमार पहिचानसे जोरल नाउँ विगारजैटी बा । थारु समुदायके बसोबास रहल गाउँ ठाउँके नाउँ अपने पहिचानसे जोरल बा । मने उहीहे बङग्याइटी विगारजैटी बा । जिहीसे हमार बास्ताविक पहिचान हेराजाइटा ।’

थारू कल्याणकारिणी सभा गोदावरी नगरसमितिके अध्यक्ष जनकलाल चौधरीके घरगोस्याम हुइलक महोत्सव उदघाटन कार्यक्रममे उहाँ थारू समुदायके पहिचानसँग जोरल लोककला, रितीसंस्कृति, गीतबास, रितीरिवाज, चालचलन, बोलीभाषा, लवाई खवाई दिनप्रति दिन हेरैटी गैल ओरसे उहीहे संरक्षण सम्वर्द्धनके लाग महोत्सव आयोजना करल बटैलै ।

थाकस कैलालीके पूर्व कावा सभापति माधव चौधरी थारू समुदायके संस्कृति संरक्षण तथा ऐतिहासिक बस्तु जगेर्ना कैना उद्देश्य सहित महोत्सव आयोजना हुइल बटैलै ।

उहाँ कहलै, ॅथारू समुदाय लोककला, रितीसंस्कृति ओ ऐतिहासिक बस्तुके जगेर्ना ओ स्थानीय पर्यटन तथा आधुनिक कृषि प्रर्वद्धनके लाग महोत्सवसे समाजके लाग सकारत्मक भूमिका खेल्ना बा ।’

महोत्सवमे थारू परिकार, कृर्षि उपज, स्थानिय उत्पादन लगायत १५ से ढेर स्टल रहल बा । महोत्सवमे २६ गाउँके थारू नाच प्रस्तुत हुइना फेन आयोजक जनैले बा । पाँच लाख अनुमानित लगानीमे हुइ लागलमहोत्सवमे हजारौँसे अवलोकन कैना अनुमान करल बा ।