खानपान ओ रिति संस्कृति हमार पहिचान होः गाउँपालिका अध्यक्ष
पहुरा समाचारदाता
हसुलिया, १४ माघ । कैलाली जिल्लाके कैलारी गाउँपालिका वडा नम्बर ४ स्थित ‘के गाउँ’ मे माघ मिलन तथा रैथाने थारु खाना प्रर्दशनी कार्यक्रम हुइल बा ।
कैलारी गाउँपालिका वडा नम्बर ४ के आयोजना तथा सहास नेपालके सहकार्य ओ सहयोगमे थारु समुदायके रिति संस्कृति सम्बद्र्धन, स्थानीय खाना प्रवद्र्धनके लाग कार्यक्रम कैगिल हो ।
कैलारी गाउँपालिका अध्यक्ष राजसमझ चौधरीके बरका पहुनामे हुइल कार्यक्रममे सम्बोधन करटी उहाँ थारु समुदाय आर्थिक रुपमे कम्जोर हुइलेसेफे रिति, कला संस्कृतिक रुपमे धनी रहल बटैलै ।
उहाँ कहलै, ‘थारु समुदायमे हरेक महिनामे गैना गीतबाँस बा । भोजविहामे गैना अपने मौलिक अपने गीतबाँस बा । टमान मेरिक टरटिहुवार बा, भेषभुषा, पहिरन, गरगहना बा । उ हमार पहिचान हो ।’
परम्परागत रिति संस्कृति संरक्षण करे नइसेक्लेसे हमार पहिचान हेरनाफे उहाँ बटैलै । थारु समुदायमे हरेक बरसके माघ महिनामे चुनजैना भल्मन्सा प्रथाहे कानूनी मान्यता डेहक लाग हम्रे तयार बाटी,’ गाउँपालिका अध्यक्ष कहलै, ‘गाउँपालिकामे दर्ता हुइल भल्मन्सा ऐनहे संशोधन करटी भल्मन्साके हकअधिकार सुनिश्चित कैना तयार बटी । भल्मन्सा बल्गर हुइलेसे केल गाउँ समाजके विकास करे सेक्ही ।’
भल्मन्सा गाउँके साझा व्यक्ति हुइल ओरसे गाउँसमाजके विकास निस्वार्थ भावानासे सेवा पैदान कैना उहाँ आग्रह करलै । रिति संस्कृतिसंगे थारु समुदायके खानापानहे संरक्षण ओ प्रबद्र्धन आवश्यक रहलफे गाउँपालिका अध्यक्ष बटैलै ।
वडा नम्बर ६ वडा अध्यक्ष प्रेमबहादुर चौधरी थारु सम्ुदायके रैथाने खानाके सम्बद्र्धनके साथे रिति संस्कृतिहे लौवा पुस्तामे हस्तान्तरण आवश्यक रहल बटैलै ।
कार्यक्रममे सहास नेपालके परियोजना अधिकृत नरेश चौधरी, जनकल्याण माविके प्रअ हनुमान चौधरी, नागरिक उन्मुक्ती पार्टीके जगमानु चौधरी, गाउँपालिका स्तरीय भल्मन्सा समितिके संयोजक सन्तराम चौधरीलगायत थारु समुदायके रिति संस्कृति हमार पहिचान ओ सान रहल ओरसे यिहीहे बचाई पर्नामे जोर डेहल रहिट ।
वडा नम्बर ४ के वडा अध्यक्ष ठागुराम चौधरीके अध्यक्षतामे हुइल कार्यक्रममे उहाँ वडा कार्यालयसे प्रत्येक बरस रिति संस्कृति संरक्षणके कार्यक्रम करटी आइल बटैलै । उहाँ कहलै, ‘माघ मिलन कार्यक्रमसे गाउँ ठाउँमे रहल परम्परागत रिति संस्कृति डेखैना अवसर मिलठ । जौन लोप हुइटी रहल संस्कृतिहेफे फेरसे जिट्टी रख्ना मौका मिलठ ।
कार्यक्रममे स्वागत मन्तव्य वडा सचिव श्रीप्रसाद चौधरी ओ संचालन सविता चौधरी, वृक्षलाल चौधरी करल रहिट । माघ मिलन तथा रैथाने थारु खाना प्रर्दशनीमे थारु समुदायके गीतबाँस, संस्कृति सरक्षक महालोक गायक मनिराम करियामघरियाके वेजोडसे दर्शक ओ कार्यक्रमके सहभागी पहुनाहुकन झुमैले रहे । उहाँ सचेनामुलक व्यङयात्मक गीतसे लेके सजना ओ आधुनिक गीतफे प्रस्तुतीकरण करल रहिट ।
ओस्टेक करके कार्यक्रममे जनकल्याण माविके स्वागत गीत, आधुनिक सखिया, झुम्रा नाँच, वडा नम्बर ४ के बजारी टोलके झुम्रा नाँच, नवलपुरके धमार गीत,झुम्रा नाँच, भित्तरिया गाउँके सोरठी नाँच, डङवा टोलके झुम्रा नाँच, अमर टोलके झुम्रा नाँच प्रस्तुत हुइल रहे ।
ओस्टे असिना टोल, मुडा टोलके सखिया नाँच, झुम्रा नाँच, प्रगति टोलके धमार गीत, खल्ला टोलके कठघोरी, झुम्रा नाँच, सुन्दरपुर टोलके झुम्रा नाँच, सहास नेपालके आधुनिक मघौटा नाँचमे प्रस्तुती, पश्चिम खेडा टोलके धमार, भक्तजनसे भजनकृतन, पश्चिम खेडाके धमार, कान्छा टोलके धमार ओ असिना टोलके पुरान भल्मन्सा जुगराम चौधरीसे बरकीमार गीत प्रस्तुतीकरण करल रहिट ।
कार्यक्रममे कार्यपालिका सदस्य लालबहादुर विका, वडा सदस्य लक्ष्मी चौधरी, मोहालाल चौधरी, हरिद्वारी चौधरी, सुवा परियार, राजनितिक दलके प्रतिनिधि, टमान टोलके भल्मन्सा, समुदायिक वनके अध्यक्षलगायत गाउँक बुद्धिजिवीहुकनके सहभागिता रहे ।
