गरिमा प्राविके तीन कोठे पक्की भवनके शिलान्यास
पहुरा समाचारदाता
हसुलिया, १५ माघ । कैलारी गाउँपालिका वडा नम्बर ४ स्थित गरिमा प्राविके तीन कोठे पक्की भवनके शिलान्यास कैगिल बा । कैलारी गाउँपालिका ओ विल्ड अन नेपालके संयुक्त लगानीमे निर्माण हुइटी रहल तीन कोठे विद्यालय भवन ओ २ कोठे शौचालय भवनके शिलान्यास गाउँपालिका अध्यक्ष राजसमझ चौधरी एक समारोहके विच करल रहिट ।
कार्यक्रममे सम्बोधन करटी उहाँ वडा नम्बर ४ स्थित खल्ला टोल ‘के गाउँ’ मे दलित, सुकुम्बासी, मुक्तकमैयाके बसोबास रहल ओ अपन पहलमे यी विद्यालयके स्थापना हुइल बटैलै । उहाँ कहलै, ‘मै पहिले एक ठो शिक्षक पेशामे रहेबेर यी विद्यालयहे जोगाइक लाग अपन तलबसे सहयोग करनु । एक ठो छोपरीसे यी विद्यालयहे सुरुवाट कैगिल रहे । अपन पहलमे भवन बन्वैनु । अब्बे बने सुरु करल भवन बनलपाछे शिक्षण क्रियाकलापमे सुधार हुई सेकी ।’
पहिले बनल भवनमे जनश्रमदान ढेर रहल मने अब्बे मनै अल्छी हुके जनश्रमदान करे छोरल उहाँ बटैलै । वडा नम्बर ४ स्थित खल्ला टोलमे विकासके सुरुवाट हुसेकल कहटी उहाँ मुख्य सडक पीचके लाग काम हुइटी रहल बटैलै ।
कार्यक्रममे विल्ड अन नेपालके इन्जिनियर मनोज चौधरी उ भवन निर्माणके लाग गाउँपालिकासे ७ लाख, विल्ड अन नेपालसे ३० लाख ओ समुदायके जनश्रमदान ६ लाख ८४ हजार ४१४ रुप्या रहना जनैले बटै । यी भवन यिहे माघ १५ गतेसे बने सुरु हुके २०८१ जेठ ५ गते सम्पन्न हुइना उहाँ जनैलै ।
कार्यक्रममे विद्यालयके शिक्षिका तथा परियोजना नेतृत्व समिति अध्यक्ष मञ्जु सोडारी, निवर्तमान कार्यपालिका सदस्य राजेश सुनार, कार्यपालिका सदस्य लालबहादुर विका लगायत मन्तव्य व्यक्त करल रहिट ।
कार्यक्रम विद्यालय व्यवस्थापन समिति अध्यक्ष भीमबहादुर तिरुवाके अध्यक्षतामे हुइल रहे । कार्यक्रममे वडा नम्बर ४ के वडा अध्यक्ष ठागुराम चौधरी, वडा नम्बर ३ के वडा अध्यक्ष सन्तराम चौधरी, विद्यालयके प्रअ चम्पा चौधरी, वडा सदस्य लक्ष्मी चौधरी, सुवा परियार, विल्ड अन नेपालके फिल्ड सुपरभाइजर शिवराज रानालगायत शिक्षक, शिक्षिका, स्थानीय बुद्धिजिवी, अभिभावकहुकनके सहभागिता रहे । कार्यक्रमके संचालन धनबहादुर ठकुल्ला करले रहिट ।
