प्रहरी युनिट इन्चार्जहुकन अपराध नियन्त्रण कैना निर्देशन
पहुरा समाचारदाता
धनगढी, १७ माघ । सुदूरपश्चिम प्रदेश प्रहरी प्रमुखसे मातहत प्रहरी युनिट इन्चार्जहुकनहे अपराध नियन्त्रण कैना निर्देशन डेले बटै ।
बुधके रोज सुदूरपश्चिम प्रदेश प्रहरी कार्यालय धनगढी,कैलालीममे एक कार्यक्रमके बीच प्रदेश प्रहरी प्रमुख प्रहरी नायव महानिरीक्षक रबिन्द्र के.सी प्रदेश अन्तर्गत कैलाली ओ कञ्चनपुर जिल्लास्थित सिमानाकामे रहल प्रहरी युनिट ईन्चार्जहुकनहे आवश्यक निर्देशन डेहल हुइट । उहाँ वर्तमान शान्ति सुरक्षाके अवस्थाके बारेमे जानकारी लेटी अइना दिनमे आई पर्न सुरक्षा चुनौती एवं समाधानके विषयमे निर्देशन डेहल हुइट ।
निर्देशन सम्बोधनके क्रममे उहाँ नेपाल भारतके सिमानाकासे हुइना भन्सार चोरी तस्करी तथा सिमानाकामे हुइना अपराधिक गतिविधिके विरुद्ध कडाईके साथ प्रस्तुत हुके काम कैना, लागू औषधके ओसार पसार, विक्री वितरणमे कडाईके साथ चेकजाँच करके नियन्त्रण कैना निर्देशन डेहल बा । ओस्टेक करके सवारी दुर्घटना नियन्त्रणके लाग नियमित रुपमे चेकजाँच कैना, फरार अपराधीहुकनके खोजी, सामाजिक अपराध रोकथाम तथा नियन्त्रणहे प्रभावकारी ढंगसे प्रस्तुत हुइना करके नागरिक ओ प्रहरी विच सुमधुर सम्बन्ध स्थापित करके नागरिकमैत्री सेवा प्रवाह चुस्त दुरुस्त बनैना निर्देशन डेलै ।
उहाँ गैह्र व्यवसायिक ओ प्रहरी आचरण विपरितके कौनोफे गतिविधिममे संलग्न नइहुके अनुशासनमे रहिके उच्च मनोवलके साथ त्रुटीरहित ढंगसे प्रभावकारी सेवा प्रवाह कैनाके साथे अवैध कारोवारहे नियन्त्रण कैना सूचना संकलन एवं विश्लेषण करके प्रभावकारी चेकजाँच कैना ओ आमजनमानसमे प्रहरीप्रतिके छवि आउर मजा पारेक लाग सृजनात्मक कार्य कैना लगायतके सम–सामयिक विषयमे आवश्यक निर्देशन समेत डेलै ।
उ कार्यक्रममे सुदूरपश्चिम प्रदेश प्रहरी कार्यालय धनगढी, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरिया कैलाली, सुदूरपश्चिम प्रदेश प्रहरी गण धनगढी, जिल्ला प्रहरी कार्यालय कैलाली, कञ्चनपुर तथा मातहत प्रहरी युनिटमे कार्यरत सिनियर प्रहरी अधिकृत तथा जुनियर प्रहरी अधिकृत लगायत प्रहरी कर्मचारीसमेतके उपस्थिति रहे ।
