भूमि उपयोग नीति कार्यान्वयनमे नाने परल ः मन्त्री चौधरी
पहुरा समाचरदाता
धनगढी, १७ माघ । सुदूरपश्चिम प्रदेश सरकारके भूमि व्यवस्था, कृषि तथा सहकारी मन्त्री रामेश्वर चौधरी भू–उपयोग नीति कार्यान्वयनमे नाने पर्ना बटैले बटै ।
भूमि व्यवस्था तथा कृषि सहकारी मन्त्रालय ओ ह्याविटेट फर ह्युमानिटी नेपालके आयोजनामे धनगढीमे बुधके हुइल प्रदेश स्तरीय भूमि आवास तथा विपद् जोखिम न्यूनीकरणसम्बन्धी प्रदेश स्तरीय नीतिगत संवादमे बोल्टी मन्त्री चौधरी जग्गा वर्गीकरणके जिम्मा पालिकाहे डेहल ओरसे पालिकासे उ काम कुशलतापूर्वक पूरा करे पर्ना बटैलै ।
उहाँ कैलालीमे प्राकृतिक तालतलैयाके उपयोग करटी जैविक विविधताहे कायम धारके मच्छरी पालन करके समेत भू–उपयोग करे पर्ना बटैलै । फरक प्रसङमे उहाँ विपद्के समय नइहुइना ओरसे प्रदेश ओ स्थानीय तहसे नीति बनाके आघे बह्रे पर्ना बटैलै ।
खेतीयोग्य जमिन मस्टी गैलपाछे खाद्यान्नमे परनिर्भरता बह्रटी गगैलमे चिन्ता व्यक्त करटी मन्त्री चौधरी सुदूरपश्चिम प्रदेशके पहाडी जिल्लाके बाँझ जग्गाहे उपयोग करे पर्ना बटैलै ।
हमार प्रदेश छेगरी ओ दुधमे आत्मनिर्भर बा खाद्यान्नमेफे आत्मनिर्भर हुइना जरुरी बा उहाँ कहलै, ‘ओकर लाग प्रदेश सरकार सरोकारवालासित समन्वय कैना तयार बा ।” उ कार्यक्रममे कैलाली कञ्चनपुरके जनप्रतिनिधि ओ सरोकारवालासे कतिपय ऐन, कानुन नइबन्ना ओ रहलफे स्पष्ट नइहुके भूमिसम्बन्धी काम कैना कठिनाइ रहल गुनासो करलै ।
कैलारी गाउँपालिकाके अध्यक्ष रामसमझ चौधरी अपन पालिकामे मुक्तकमैया सुकुम्वासी, कमलरी अत्यधिक रहल बटैटी उहाँहुकनहे डेना जग्गा उपलब्ध नइरहल बटैलै ।
कैलालीके जानकी गाउँपालिकाके अध्यक्ष गणेश चौधरी ऐन, कानुनके अभावमे भूमि व्यवस्थापनसम्बन्धी काम कैना पालिका ओ भूमि आयोगहे कठिनाइ हुइल बटैलै । कञ्चनपुरके लालझाडी गाउँपालिके अध्यक्ष निर्मल राना ऐन, कानुनके अभावमे वाढपीडितहे व्यवस्थापन कैना कठिन हुइल बटेलै ।
टीकापुर नगरपालिके नगर प्रमुख रामलाल डगौरा नगर विकाससँग जग्गा बा मने स्थानीय तहहे ओकर व्यवस्थापन कैना अधिकार नइरहल बटैलै ।
भूमि आयोग कैलालीके अध्यक्ष यज्ञराज उपाध्याय विगतके आयोगसे अधुरा, अपूरा काम करल ओरसे काम कैना चुनौती रहल बटैटी भूमि ऐन संशोधन हुई पर्ना बटैलै । फागुन महिनाभिटर नौ ठो पालिकामे लालपुर्जा वितरण सुरु हुइनाफे उहाँ बटैलै । उहाँ जग्गा वितरणके काम कैना प्राविधिक जनशक्तिके अभाव रहल बटैलै ।
नापी कार्यालय, कैलालीके प्रमुख जनकराज भट्ट प्राविधिक कर्मचारी, भौतिक पूर्वाधारलगायतके समस्याके कारण नाप नक्साके काममे ढिलाइ हुइल बटैलै ।
उ अवसरमे कुछ जनप्रतिनिधिसे कृषिमे काम नइकरुइया प्रदेश सरकारसे प्रोत्साहन पाइल गुनासो करलै । गौरीगंगा नगरपालिकाके प्रमुख देवीलाल कँडेल कहलै, “कृषिमे काम नइकरुइयाहे अनुदानलगायतके काम डेहेबेर उत्पादन नइबह्री, ओसिनहे कृषिसंग मायाफे नइरहठ । कागज मिलाके बजेट लेना केल हुइट ।”
कार्यक्रममे सुदूरपश्चिम प्रदेश सरकारके भूमि व्यवस्था, कृषि तथा सहकारी राज्य मन्त्री कैलाश चौधरी, प्रदेश नीति तथा योजना आयोगके उपाध्यक्ष अनुप उपाध्याय, प्रदेश सरकारके प्रमुख सचिव डा. हरिप्रसाद लम्साललगायतके उपस्थिति रहे ।
