वातावरण संरक्षण कार्यशाला गोष्ठी

पहुरा समाचारदाता
कञ्चनपुर, १८ माघ । कञ्चनपुर जिल्लाके बेलौरी नगरपालिकामे वातावरण संरक्षण ओ वातावरणके अधिकार सम्बन्धी कार्यशाला गोष्ठी विफेक बेलौरी नगरपालिका वार्ड नं. २ के सभाहलमे सम्पन्न हुइल बा ।

बेलौरी नगरपालिका स्तरीय मानवअधिकार समुहसे अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय धनगढी ओ बेलौरी नगरपालिकाके सहयोगमे कार्यशाला गोष्ठी आयोजना करल रहे ।

अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालयके संयोजक खडकराज जोशी राष्ट्रिय वातावरण नीति २०७६ प्रस्तुत करटी नीतिका कार्यान्वयनके अवस्थाके बारेमे सहजीकरण करटी बेलौरी नगरपालिकासे जारी करल वाताबरण तथा प्राकृतिक श्रोत संरक्षण ऐन २०७९ मे रहल व्यवस्थाबारे सहभागीहुकनहे जानकारी करैलै ।

कार्यशाला गोष्ठीमे मानबअधिकार समुह बेलौरीके उपाध्यक्ष पदमबहादुर शाह बेलौरी नगरपालिका वार्ड नं. १० मे रहल चिनी मिलसे उत्सर्जन हुइना दुर्गन्ध तथा फोहोरसे मानब स्वास्थ्यमे परटी रहल असरमे कारण गम्भीर समस्या निम्ते सेक्नाप्रति सजग रहिके आवश्यक नीति निर्माण करके उ चिनी मिलके व्यवस्थापन कैना स्थानीय सरकारसंग आग्रह करलै ।

उहाँ टिनामे प्रयोग हुइटी रहल विषादी तथा अन्नबाली भण्डारण करेबेर प्रयोग कैना विषादीसे दैनिक रुपमे उपभोक्तासे मन्द बिष सेवन करटी रहल बाट उल्लेख करटी, नेपालके खेतीयोग्य जमीनमे अस्टे करके रसायनिक मलके प्रयोग हुइटी जैना हो कलेसे अइना १५ बर्षमे नेपाली माटीसे कौनोफे उत्पादन नइडेना विचार रख्लै ।

बेलौरी नगरपालिकाके २ नं. वडा कार्यालयके वडाअध्यक्ष कलबिर चौधरी नगरपालिकामे हालसमफे विपद व्यवस्थापन शाखा स्थापना नइरहल ओरसे अपनहे सम्पादन करे पर्ना काम प्रभावकारी हुई नइसेकल बाट स्वीकार करटी, वातावरण संरक्षणके लाग नगरपालिकासे वातावरण संरक्षण नीति निर्माण करके काम करटी रहल बटैलै । उहाँ नगरपालिका क्षेत्रमे स्थापना हुइल उद्ययोग, कल कारखानाके लग्गेक नागरिकहुक्रे आवास निर्माण कैना कारण समस्या उत्पन्न हुइटी रहल बटैलै । बेलौरी नगरपालिकामे घरनक्सा पास करके घर निर्माण करुइयाके संख्या एकदम न्यून रहल ओरसे के केहोर घर बनैटी बा नगरपालिकासे अनुगमन कैना समस्या हुइटी रहल बटैलै । सरोकारवाला कहल प्रत्येक नागरिक हुई पर्नामे वडाअध्यक्ष तथा जनप्रतिनीधिहे केल ठेक्का डेहल जस्टे मनसाय आम नागरिकमे दुर्भाग्य पुर्ण रहल बटैलै ।

बेलौरी नगरपालिका वार्ड नं. २ के जननिर्वाचित वडा सदस्य बिक्रम चौधरी इटा भट्टा लगाएतके उद्योग संचालन कैना अनुमति डेहेबेर स्थलगत निरीक्षण कैना आवश्यक रहल विचार रख्लै ।

श्री लक्ष्मी माविके प्रधानाध्यापक विरेन्द्र भण्डारी समुदायमे निर्माण हुइटी रहल सडकमे माटी डारके गाडी हक्टी रहल मने निर्माण कैना पक्षसे पानी नइडारेबेर धुर उरके टमान रोगके संक्रमण हुइटी रहल चिन्ता व्यक्त करलै । पछिल्का समयमे नदिनाला अतिक्रमण कैना क्रम बढल ओरसे यिहीहे नियन्त्रण करे नइसेक्लेसे बर्षायाममे डुबानके समस्या अइना ओर सजक रहन आग्रह करलै ।

मानवअधिकार समुह बेलौरीके अध्यक्ष गोविन्द प्रसाद सापकोटा प्रत्येक नागरिकके घरसे निकरना फोहोरहे सरना नइुरना फोहोरहे छुट्याके व्यवस्थापन करे सेक्लेसे केल वातावरणहे स्वच्छ बनैना कुछ हदसम सहयोग हुइना कहटी आबके बदल्टी परिवेशमे नागरिकसे अधिकारसंगसंगे नागरिक कर्तव्यफे पालना कैना आग्रह करलै ।

बेलौरी नगर स्तरीय मानवअधिकार समुहके संयोजक गोविन्द प्रसाद सापकोटाके अध्यक्षता ओ वार्ड नं. २ के वडा अध्यक्ष कलविर चौधरीके वरका पहुनामे हुइल कार्यक्रममे मानवअधिकार समुह बेलौरीके सचिव कमला चौधरी स्वागत मन्तव्य राखल रहिट कलेसे कार्यक्रमके संचालन तथा सहजीकरण इन्सेक कञ्चनपुरके सहजकर्ता कैलाश पनेरु करल रहिट ।