धनगढीके सडक ६ प्याकेजमे निर्माण कैना

पहुरा समाचारदाता
धनगढी, १८ माघ । सुदूरपश्चिम प्रदेश सरकारके भौतिक पुर्वाधार विकास मन्त्रालयसे धनगढीउपमहानगरपालिकाके १९ वडामे पहिल चरणके सडक ६ प्याकेजमे निर्माण कैना टेण्डर आहवान करले बा ।

मन्त्रालयसे ६ प्याकेजमे ठेक्का आव्हान करटी सडकके कालोपत्र पिच, ढल निकासके काम आघे बढैना जनैले बा । यी वर्ष बहुवर्षीय आयोजनाके रुपमे पहिल चरणमे निर्माण सम्पन्न कैना ६ ठो प्याकेज अन्तरगत काम आघे बह्रना भौतिक पूर्वधार विकास मन्त्रालयके सचिवालय जनाइल हो ।

जेकर मन्त्रालयसे ६१ करोडके बजेट छुट्याइल बा । प्याकेज १ अनुसार धनगढी वडा न ४ के रातोपुल, टेम्पल रिसोर्ट, शिवपुरी, तुल्सीचोक हुइटी भगवती टोलसमके सडक रहल बा । ओस्टे धनगढी वडा न ३ के वाणिज्य बैक, विशालनगर, जनता आधारभूत विद्यालय, विरेन्द्र चोक हुइटी रिङरोड जोरना सडक, नेशनल मार्ग सडक, धनगढी वडा न २ के मेनरोड रुवस होटल हुइटी बैयावेहडी सडक ओ पुरान भन्सार रोड सडकके काम आघे बह्रना भौतिक पूर्वधार विकास मन्त्रालय सचिवालय जनैले बा ।
प्याकेज २ ममे ४ सडकके काम आघे बह्रना हुइल बा । जेम्ने धनगढी वडा न ८ से १२ न वडा समके धनगढी गाउँ जुगेडा सडक कालोपत्र, धनगढी वडा न ८ के पुष्पलाल चोकसे धनगढी गाउँ समके सडक, धनगढी वडा न ७ के कैलाली बहुमुखी क्यामपससे जाखोरताल समके सडक ओ धनगढी वडा न १ के त्रिवेणी सडकके काम आघे बह्रना हुइल बा ।

प्याकेज नम्बर ३ मे धनगढी वडा न ५ नैनादेवी पुरान हसनपुर सडक,धनगढी वडा न ५ ओ ३ जोरना सामुदायिक प्रहरी पिपल चौतारासे बोराडाँडी हुइटी फाप्ला रिङरोड समके सडक काम आघे बह्रना हुइल बा ।

प्याकेज नम्बर ३ अनुसार धनगढी वडा न १३ मैदा मिलसे हिमाली टोल, कैलाली गाउँ प्रहरी पोष्ट हुइटी ढुंगेबजारसमके सडक, धनगढी वडा न १३ राजपुर चोकसे पुर्व वडा कार्यालय जैना सडक निर्माण सम्पन्न कैना बताइल बा । ओस्टे प्याकेज ४ मे धनगढी वडा न ११ वहिरा स्कुलसे दक्षिणकाली टोल जैना सडक, धनगढी वडा न ४ गठवन्धन चोकसे शिवपुरीधाम समके सडक कालोपत्रे करके निर्माण हुइना बा । प्याकेज नम्बर ५ अनुसार धनगढी वडा न ६ मल्लो मटयारी ढुंगेवजार पश्चिम चोकसे उत्तरकृष्णटोल ओ एकताटोल हुइटी लक्ष्मीनगर जैना डगर कल्भर्ट ओ नाली निर्माण सडकके काम हुइना बा । धनगढी वडा न ४ शहिदगेट,शिवपुरी, न्यूरोड सडक खण्डसे कैलालीचोक सम सडक कालोपत्रे हुइना प्रदेशके भौतिक पूर्वधार विकास मन्त्रालयके सचिवालय जनैले बा ।

ओस्टे प्याकेज नम्बर ६ अन्तरगत धनगढी उपमहानगरपालिका वडा न २ खप्तड वडीमालिका टोल सडकके निर्माणके काम हुइना जनागिल बा । धनगढी उपमहानगरपालिका वडा न २ नन्दलाल पन्तके घरसे पुर्व भरत जोशीके घरसम पक्की नालासहित ढल निकास काम सम्पन्न हुइना जनाइल बा । यी सक्कु सडकके ठेक्का आव्हान हुसेकल ओरसे काम हाली आघे बह्रना जनाइल बा ।