कैलारीमे पाँचौ अध्यक्ष रनिङ कप सुरु
पहुरा समाचारदाता
हसुलिया, २० माघ । कैलारी गाउँपालिका स्तरीय पाँचौ अध्यक्ष रनिङ कप २०८० खेलकुद प्रतियोगिता शनिच्चरसे सुरु हुइल बा ।
कैलारी यूथस यूनाईटेड क्लवके आयोजना तथा कैलारी गाउँपालिकाके मुख्य प्रवद्र्धकमे उ प्रतियोगिता हुइटी रहल बा ।
कैलारी–७ शंकर यूवा क्लव छोटी बसन्ताके खेल मैदानमे सुरु हुइल खेलकुद प्रतियोगिता गाउँपालिका अध्यक्ष राजसमझ चौधरी एक कार्यक्रमके विच उदघाटन करल रहिट ।
उदघाटन कार्यक्रममे बोल्टी उहाँ खेलाडीनहे मुलुकहे राष्ट्रिय अन्तर्राष्ट्रियमे चिन्हैना काम करटी रहल बटैले बटै । एक थरिके यूवा लागु औषधके दुव्र्यशनीमे फस्टी रहल ओरसे यूवाहे खेलकुदमे व्यस्त धारे सेक्लेसे कुलतसे बचाई सेक्ना बटैलै । गाउँपालिकासे खेलकुदमे बार्षिक लाखौ रकम खर्च करटी रहल ओरसे खेलाडीसे लगानीअनुसार प्रतिफल डेखैना जरुरी रहल बटैलै ।
गाउँपालिका उपाध्यक्ष भगवतीकुमारी चौधरी खेलाडीहुक्रे आब खेलकुदसँग सँगै देशके विकासओर ध्यान डेहे पर्ना बटैली । खेलाडीहुकनके लाग पालिकासे प्रत्येक बर्ष खेल सामाग्रीके व्यवस्था लगायत टमान खेलकुद प्रतियोगितामे सहभागिता जनैना बेला सहयोग करटी आइल बटैली ।
कैलारी–३ के वडा अध्यक्ष सन्तराम चौधरी लगानी अनुसार प्रतिफल आई नइसेकल बटैलै । उहाँ कहलै, ‘पालिकासे खेलकुदमे ढेर खर्च करले बा । मने सोचल जस्टे प्रतिफल नइआके लगानी खेर गैल जैसिन हुइल बा ।
नेपाली काँग्रेस कैलारी गाउँपालिका सभापति कृष्ण प्रसाद चौधरी अनुसाशन पूर्वक खेलकुद सम्पन्न कैना आग्रह करलै । उहाँ कहलै, पालिकास्तरीय अध्यक्ष कप खेलाडीके टिम छनौटके लाग हो । यम्ने मजासे खेलकुद प्रर्दशन करे सेक्लेसे टमान ठाउँमे अवसर मिल्न मौका आई ।’
कैलारी यूथस यूनाईटेड क्लवके अध्यक्ष बनसराम चौधरीके अध्यक्षतामे हुइल खेलकुद उदघाटन कार्यक्रममे स्वागत मन्तव्य रामस्वरुप चौधरी ओ संचालन मञ्जु चौधरी करल रहिट । उदघाटन कार्यक्रममे नौ वडाके वडा अध्यक्ष, कार्यपालिका सदस्य, वडा सदस्य, गाउँपालिकाके टमान शाखाके प्रमुख, टमान राजनितिक दलके प्रतिनिधि, यूवा क्लव, भल्मन्सालगायत खेलाडीहुकनके सहभागिता रहल रहे ।
