अवैध लागूऔषध प्रयोगकर्ता बह्रलैं

टमान ठाउँसे १२ जाने पक्राउ

पहुरा समाचारदाता
धनगढी, १ फागुन । अवैध लागूऔषधसहित प्रहरी टमान ठाउँसे ७ सात जनहनहे पक्राउ करले बा ।

कैलालीके गोदावरी नगरपालिका–१ भरतपुरसे अवैध लागूऔषध खैरो हेरोइन ३ ग्राम ४ सय १० मिलिग्राम ओ नगद १९ हजार रूप्यासहित उहे ठाउँ बैठना १९ वर्षीय रमेश बडैलाहे सोम्मार दुपहर प्रहरी पक्राउ करले बा । ईलाका प्रहरी कार्यालय अत्तरियासे खटल प्रहरी बडैलाके घरके तलासी करेबेर उ पदार्थ फेला पारके उहाँहे पक्राउ करल हो ।

ओस्टेक करके कैलालीके धनगढी उपमहानगरपालिका–४ से अवैध लागूऔषध ब्राउनसुगर २ ग्रामसहित २ जनहनहे सोम्मार दुपहर प्रहरी पक्राउ करले बा । पक्राउ परुइयामे उहे ठाउँ बैठना ३६ वर्षीय भरत चौधरी ओ २० वर्षीया सिर्जना चौधरी रहल बटै । नशालु पदार्थ सेवन करके एक जाने ५५ वर्षीया महिलाहे ओइने कुटपिट करल कना खबर प्राप्त हुइटीकी अस्थायी प्रहरी पोष्ट शिवपुरीधामसे खटल प्रहरी ओइनहे उ लागूऔषधसहित पक्राउ करल हो ।

ओस्टेक दुई दिन आघे प्रहरीसे कैलाली ओ कञ्चनपुरके टमान ठाउँसे अवैध लागु औषधसहिट पाँच जनहनहे पक्राउ करल रहे ।
कैलालीके टिकापुर नगरपालिका वडा नं. १ एकतापुर स्थित गणतन्त्रणचोक लग्गेसे २७० मिलिग्राम लागू औषध खैरो हेरोईनसहित उहे ठाँउ बैठना बर्ष २२ के भीसम बहादुर शाहीहे अँटवार साँझ प्रहरी पक्राउ रहिट । ईलाका प्रहरी कार्यालय टिकापुर, कैलालीसे खटल प्रहरी टोलीसे शंका लागके चेकजाँच करेबेर ओइनथेनसे उ पदार्थ फेला पारके आवश्यक प्रक्रिया पुरा करके उ पदार्थ सहित हुकहिनहे पक्राउ करल हो ।

ओस्टेक करके कञ्चनपुरके बेलौरी न.पा.७ पौलाहसे १३.०६ ग्राम लागू औषध खैरो हेरोईनसहित जिल्ला कैलाली गौरीगंगा न.पा. ९ शंकरपुर बैठना बर्ष ३३ के जनक सापकोटासमेत दुई जनहनहे अँटवार साँझके प्रहरी पक्राउ करल रहे ।
ईलाका प्रहरी कार्यालय बेलौरी कञ्चनपुरसे खटल प्रहरी टोलीसे चेकजाँच कैना क्रममे ओइनके थेनसे उ पदार्थ फेला पारके आवश्यक प्रक्रिया पुरा करके उ पदार्थ सहित ओइने प्रयोग करल मोटरसाईकल थान–१ ओ दुनहुनहे पक्राउ करल हो ।

ओस्टेक कञ्चनपुर, वेदकोट न.पा.१० दैजीसे ६.६५ ग्रामगाँजा सहित उहे ठाँउ बैठना बर्ष २५ के सन्तोस खड्कासमेत दुई जनहनहे अँटवार रात प्रहरी पक्राउ करल रहे । जिल्ला प्रहरी कार्यालय कञ्चनपुरसे खटल प्रहरी टोलीसे शंका लागके चेकजाँच करेबेर ओइनथेनसे उ अबैध लागू औषध गाँजा फेला पारके आवश्यक प्रक्रिया पुरा करके उ पदार्थ सहित ओइनहे पक्राउ करल हो ।

ओस्टेक करके बर्दिया जिल्लाके बारबर्दिया नगरपालिका–४ बरबट्टा खेलमैदानसे अवैध लागूऔषध ब्राउनसुगर सहित ७ ग्राम ५ सय मिलिग्रामसहित २ जनहनहे सोम्मार साँझ प्रहरी पक्राउ करले बा ।

पक्राउ परुइयामे भारत बहराईच थरीपुरी गाउँ पञ्चायत बैठना २३ वर्षीय सुजीत कुमार ओ बारबर्दिया नगरपालिका–४ बरबट्टा बैठना १७ वर्षीय किशोर रहल बटै । ईलाका प्रहरी कार्यालय बानियाभार ओ बीओपी तारातालसे खटल संयुक्त प्रहरी युपी ४० एके १५५६ नम्बरके मोटरसाइकलहे जाँच कैना क्रममे मोटरसाइकलमे सवार ओइनहे उ पदार्थसहित पक्राउ करल हो ।

ओस्टे मोरङ जिल्लाके विराटनगर महानगरपालिका–१६ भट्टी मोड छेउसे अवैध लागूऔषध खैरो हेरोईन ११ ग्रामसहित २ जनहनहे सोम्मार दुपहर प्रहरी पक्राउ करले बा । पक्राउ परुइयामे उहे महानगरपालिका–१६ बैठना ३१ वर्षीया हेमा तामाङ ओ ४० वर्षीया मुना लामा रहल बटै । लागूऔषध नियन्त्रण ब्यूरो बिराटनगर ओ ईलाका प्रहरी कार्यालय रानीसे खटल प्रहरी ओइनहे उ पदार्थसहित पक्राउ करल हो ।

करिब ४ सय ७ किलो गाँजासहित दुई जे पक्राउ

सुनसरी जिल्लाके बराहक्षेत्र नगरपालिका–९ राजाबाससे अवैध लागूऔषध गाँजा करिब ४ सय ६ किलो ९ सय ४० ग्रामसहित २ जनहनहे सोम्मार रात प्रहरी पक्राउ करले बा ।

पक्राउ परुइयामे धरान उपमहानगरपालिका–४ बैठना २५ वर्षीय सूर्य राई ओ भोजपुर हतुवागढी गाउँपालिका–८ बैठना २७ वर्षीय लक्ष्मण राई रहल बटै । ईलाका प्रहरी कार्यालय महेन्द्रनगरसे खटल प्रहरी बराहक्षेत्र नगरपालिका–९ राजाबासस्थित दाहसंस्कार कैना घाट लग्गे प्रदेश ०१–०२–००१ ज ४०५० नम्बरके बोलेरो गाडीहे जाँच कैना क्रममे गाडीमे १३ ठो बोरामे रहल उ परिमाणके गाँजा फेला पारके चालक सूर्य ओ गाडीमे सवार लक्ष्मणहे पक्राउ करल हो । यी सम्बन्धमे प्रहरी आवश्यक अनुसन्धान करटी रहल बा ।