डडेलधुरा मेडिकल कलेजमे पठनपाठन सुरु
पहुरा समाचारदाता
धनगढी, १ फागुन । सुदूरपश्चिम विश्वविद्यालय मातहत रहल डडेलधुरा मेडिकल कलेजमे मंगरसे पठनपाठन सुरु हुइल बा । बिएससी एमएलटी (ब्याचलर्स इन मेडिकल ल्याब टेक्नोलोजी) सञ्चालनके अनुमति पाइल मेडिकल कलेजसे पठनपाठन सुरु करल हो ।
मेडिकल कलेजके डिन डा. हेमनाथ जोशी १० जानेक कोटा पाइलमे अब्बेसम ८ जाने विद्यार्थी भर्ना हुइल बटै । यिहेबीच अध्ययनरत विद्यार्थीहुकनहे अभिमुखीकरण करल बा । डडेलधुरा अस्पताल विकास समितिके अध्यक्ष करुणाकर ओझा पढाइ सुरु कैना आघे विद्यार्थीनहे अभिमुखीकरणफे करल बटैलै ।
साथे कार्यक्रममे मेडिकल कलेजके अध्यापक ओ विद्यार्थीहुकनहे स्वागतफे करल बा । सरकारसे डडेलधुरा अस्पतालहे मेडिकल कलेजके रूपमे सञ्चालन कैना घोषणा करलपाछे ५ ठो विषयके अध्यापन अनुमति मागल रहे । मने चिकित्सा शिक्षा आयोगसे यी वर्ष भर बिएससी एमएलटी अध्ययनके अनुमति केल डेहल रहे । एमबिबिएसके पढाइ सुरु कैना भर डडेलधुरा अस्पताल कम्तीमेफे तीन सय श्ययामे स्तरोन्नति हुइना आवश्यक बा ।
अब्बे अस्पताल एक सय शय्यामे चल्टी आइल बा । तत्काल तीन सय शय्यामे अस्पताल स्तरोन्नति हुइलेसे हम्रे ०८३ से एमबिबिएसके पढाइ सुरु करे सेक्ना बताइल बा । मेडिकल कलेज सञ्चालनके लाग सुदूरपश्चिम विश्वविद्यालयके नाममे डडेलधुराके तुफानडाँडास्थित ८४ रोपनी जग्गा प्राप्त हुइल बा । ओस्टेक करके, डडेलधुरा अस्पतालके नाममे दुई सय ३४ रोपनी जग्गा बा । सुदूरपश्चिम विश्वविद्यालयसे डडेलधुरामे डिनके कार्यालय स्थापना करसेकल बा ।
