सबडिभिजन वन कार्यालय पन्डौनके भवन उदघाटन

जमुना न्युरे
पन्डौन, १ फागुन । कैलाली जिल्लाके मोहन्याल गाउँपालिका वडा ४ खिमडिमे सब डिभिजन वन कार्यालय पन्डौनके नव निर्मित भवन मंगरके रोज एक कार्यक्रम विच उदघाटन करल बा ।

उदघाटन कार्यक्रममे बोल्टी मोहन्याल गाउँपालिका अध्यक्ष देवीदत्त उपाध्याय वन कार्यालय ओ और कार्यालय अक्के निकाए रहल बटैलै । स्थानीय सरकार सन्चालन ऐन २०७६ अनुसार गाउँपालिकासे सामुदायिक वनके कुल आम्दानीके १० प्रतिशत रकम गाउँपालिकाहे डेहे पर्ना बटैलै ।

उहाँ कहलै, सामुदायिक वन गाउँपालिकासंग समन्वय नइकरलेसे सामुदायिक वनके रकम विद्यालय, डगर निर्माण, टमान कार्यक्रममे पदाधिकारीहुक्रे अपन खुशी रकमके खर्च करके अब्बे मोहन्याल गाउँपालिकाके ढेर सामुदायिक वन अख्तियारके फन्दा परल बटैलै ।

कार्यक्रममे बोल्टी मोहन्याल गाउँपालिका वडा २ अध्यक्ष जयप्रकाश मल्ल सब डिभिजन पन्डौन कार्यालय बनलमे खुशी व्यक्त करलै । अपन कार्यालय क्षेत्रगत रुपमे जिल्ला वनसे चासो डेहे परठ, पहाडी क्षेत्रमे सामुदायिक वन मोहन्याल गाउँपालिकाके विकासमे टेवा पुगैले बटै । सामुदायिक वनहे डिभिजन वनसे निगरानी करेपर्ना, आर्थिक पारदर्शितामे जोड डेहे उहाँ बटैलै ।

कार्यक्रममे बोल्टी भुकृटी माध्यामिक विद्यालयके प्रअ चक्र बहादुर रास्कोटी सामुदायिक वनके आम्दानी सुरक्षित नइरहल बटैलै । उहाँ कहलै, ‘आम्दानी के उपलब्धी नइहो । उपभोक्ताहे आर्यआर्जन जैसिन कार्यक्रम नइकरठ । सामुदायिक वनके निर्णय होटेलसे करजाइठ ।’ सामुदायिक वनमे काठ बिक्री वितरणममे प्रत्यक्ष रुपमे काठ व्यवसायीके भुमिका हुइना जिहीसे आम उपभोक्ताहुकनहे कुछ बाट पत्ता नइहुइना बटैलै ।

शिव शक्ति सामुदायिक वन अध्यक्ष गोपाल थापा स्थानीय तहसंग समन्वय नइहुइल पालिकाहे सामुदायिक वनके आम्दानी १० प्रतिशत रकम डेना घोषणाहे आम्दानीके स्रोतहे परिचालन पालिकासे निगरानी कैना, सामुदायिक वनहे हेर्ना नजर फरक रहल, जबफे आर्थिक केल नइहेरके सामुदायिक वनके सरक्षणमे ध्यान डेहे पर्नामे जोड डेलै ।

सब डिभिजन वन पन्डौनके भवन उदघाटन करटी डिभिजन वन कार्यलय पहलमानपुरके प्रमुख रामविचारी ठाकुर सबडिभिजन पन्डौनके भवन निर्माणके लाग जग्गा उपलब्ध कराके सकर दर्नलाहे विशेष धन्यवाद डेटी अइना दिनमेफे वन कार्यालयहे सहयोग कैना आसावादी रहल बटैलै ।

जौनफे निकाय हुइलेसेफे यहाँके विकासमे जोड, विकासमे एकजुट, हम्रे सक्कु जाने वन ऐन ओ स्थानीय सरकार संचालन ऐन यहाँके वन विकास, सामुदायिक वनके सरक्षण तथा सदुपयोग करटी आर्थिक पारदर्शिता बनैटी बजेट बाँडफाँट कैना वनके कार्यसम्पादन कैना अपने भवनसे सेवा डेलेसे सेवाग्राहीहे अब सहज हुइना जोड डेलै । कार्यालयके भवन निर्माण डिभिजन वनके ४६ लाख ३६ हजार लागतमे बनाइल रहे ।