‘निर्णायक तहमे सीमान्तकृत समुदायके पहुँच नइपुगल’
पहुरा समाचारदाता
धनगढी, १ फागुन । सीमान्तकृत समुदायके पहुँच निर्णायक तहमे पुगे नइसेकल कारण ओइने सेवा सुविधासे बञ्चित रहल बटै ।
एकाउन्टीविलिटी ल्यापसे मंगरके रोज धनगढीमे आयोजना करल निर्णायक तहमे सीमान्तकृत समु्दायके पहुँच ओ सहभागिता विषयक अन्तरक्रिया कार्यक्रममे उ समुदायके व्यक्तीहुक्रे उ बाट बत्वाइल रहिट । धनगढी उपमहानगरपालिका वडा नम्बर १ मे रहल मदरसा नुरुनाकी प्रावि २०६४ सालमे स्थापनाहुके संचालन हुइल पप्पु कुरैसी बटैलै । उहाँ कहलै, ‘हमार विद्यालय धनगढीमे मुटुमे बा । उ विद्यालयमे एक ठो राहत कोटामे शिक्षक केल डेले बा । विद्यालयमे डेस्क वेञ्चफे नइहो । विद्यार्थी पुरान फाटलचिटल कर्पेटमे बैठके पह्रना बाध्य बटै ।’
स्थानीय सरकारसे ओकरबारे टमान चो बाट धरलेसेफे सुनुवाई नइहुइल कुरैसी बटैलै । विद्यालयमे शिक्षके कमी बा, निजि स्रोतसे धारल शिक्षक तालिमसे बञ्चित रहल उहाँ बटैलै । उपमहानगरपालिकामे मुस्लिम समुदायके बस्ती रहल ओ ढेर एकदु्ई पुस्तासे बैठुइयाफे नागरिक लगायत सेवा सुविधासे बञ्चित हुइल पप्पु बटैलै ।
उहाँ कहलै, नेताहुक्रे चुनावके बेला केल बस्तीमे अइना जिटके गैलपाछे कबु गोरनइटेक्ठै । जेकर कारण सीमान्तकृत समुदाय राज्यसे सेवा सुविधासे बञ्चित हुइटी गैल बटै ।’ सुदूरपश्चिम समाजके हेमराज जैसी यौनिक तथा लैङिक अल्पसंख्यक समुदायहे समाज ओ राज्यके हेर्ना नजरिया फरक रहल बटैलै । उहाँ कहलै, ‘कैलाली जिल्लामे धनगढी उपमहानगरपालिका ओ कैलारी गाउँपालिकासे बजेट तथा कार्यक्रमके लाग बजेट छुटयाइले बा । और पालिकासे काहे नइ छुटयाइना ।’ यौनिक तथा लैङिक अल्पसंख्यक समुदायके टमान मेरके अधिकारसे बञ्चित हुइल मने राज्यके ओहोर ध्यान नइगैल बटैलै । थारु कल्याणकरिणी सभा कैलालीके निवर्तमान सभापति माधव चौधरी स्थानीय सरकारसे भौतिक विकास केल नाही सामाजिक, आर्थिक ओ सांस्कृतिक विकास कैना बटैलै । यूवा अभियन्ता ठाकुर प्रसाद करियाप्रधान स्थानीय तहसे कैगिल मजा कामके सर्मथन ओ गलट कामके विरोध करे पर्ना बटैलै । उहाँ कहलै, ‘धनगढी उपमहानगरपालिकासे करके दायर बह्रैले बा, उ चाही मजा हो मने जथाभावी करके दायरा बह्रैना नइमजा रहल हो ।’ धनगढी उपमहानगरपालिका स्मार्ट सिटीके अभियान चलैले बा कलेसे १९ वडामे सामान विकास आवश्यक रहल बटैलै । संचारकर्मी सुरज राना सांस्कृतिक कार्यक्रमके लाग रानाथारु समुदायके लाग बजेट विनियोजना करल लोप हुइटी रहल परम्परागत पहिरना भेषभुसाके लाग बजेट न्यून रहल बटैलै । कार्यक्रममे सीमान्तृक समुदायके अवस्थाबारे कार्यपत्र, राजनितिक दलके चुनावमे पहँुच, बजेट निर्माण प्रक्रिया, योजना छनौटबारे कार्यपत्र प्रस्तुत करल रहिट । उहाँ राजनिकि नेतृत्वमे महिलाहे सहभागिता कराई नइचाहल बटैलै । धनगढी उपमहानगरपालिकाके कार्यपालिका सदस्य चक्र विक जनप्रतिनिधि विच तलमेल नइमिलल कारण काम कैना अप्ध्यारो रहल बटैलै । वडा नम्बर ७ के वडा अध्यक्ष मोति रानाथारु कार्यपालिकाके बैठकमे अनुशासनके कमी रहल बटैलै । स्थानीय तहहे राजनीति कैना थलो बनाइल कारण अवस्था विग्रटी गैल बटैलै । धनगढी उमहानगरपालिकाके महिला तथा बालबालिका शाखा प्रमुख पंकजा जोशी टोल विकास संस्था गठन करके योजना नन्ना काम हुइटी रहल बटैली । उहाँ जेसी मैत्री योजना छनौट प्रक्रियामे छलफल करैना अभ्यासके सुरुवाट करल बटैली । भौतिक निर्माण प्रक्रियामे महिलाके सहभागिता बह्राइल ओ अपाङगता रहल व्यक्तीहुकनके सहायक सामाग्रीय वितरण करल बटैली । कार्यक्रमके उद्देश्यबारेमे एकाउन्टीविलिटी ल्यापके प्रविन राना ओ सहजीकरण तेज बोहरा करले रहिट ।
