बोण्ड इंगलिस बोर्डिङ स्कूलके १६औं वार्षिकोत्सव सम्पन्न

पहुरा समाचारदाता
हसुलिया, ४ फागुन । कैलाली जिल्लास्थित कैलारी गाउँपालिका वडा नम्बर ५ मे रहल बोण्ड इंगलिस बोर्डिङ स्कूलके १६औं वार्षिकोत्सव तथा अभिभावक दिवस शुकके रोज विविध कार्यक्रमके साथ सम्पन्न हुइल बा ।

कैलारी गाउँपालिका वडा नम्बर १ के वडा अध्यक्ष धोजहरिपाल बोहराके वरका पहुनामे हुइल कार्यक्रममे उहाँ विद्यार्थीनके भविष्य उज्वल बनैना अभिभावक जिम्मेवारी रहल बटैले बटै । उहाँ कहलै, ‘विद्यार्थीके पहिल पाठशाला ओइनके अभिभावक, घर परिवार रहल ओरसे घरमे विद्यार्थीनहे ढेर ध्यान डेहे परठ । विद्यार्थीहुक्रे विद्यालयमे ५÷६ घण्टा रहठै । विद्यालयमे शिक्षक मजासे पह्रलेसेफे घरे गैल विद्यार्थीनहे अभिभावक गृहकार्य नइकरैलेसे, पह्रना वातावरण नइबनैलेसे विद्यार्थीके पह्राईमे सुधार हुई नइसेकी ।’ कोई विद्यार्थी कम्जोर बा कलेसे उहीहे डटलेसे ओइनहे मनोवल उल्टे झन गिरना ओरसे ओइनहे बल्की मायासे सिखैलेसे पह्राईमे सुधार हुइना बटैलै ।

कार्यक्रममे विद्यालयके संस्थापक प्रिन्सिपल तिलक बोहरा अभिभावकहुकनके माया ओ सहयोगसे विद्यालय यहाँसम पुग्के अब्बे १६औं वार्षिकोत्सव मनैना सफल हुइल बटैलै । उहाँ कहलै, ‘बोण्ड इंङलिस बोडिङ स्कूल सैद्धान्तिक शिक्षासंगे व्यवहारिक ओ संस्कारिक शिक्षामे जोर डेले बा । विद्यालयसे अब्बे शैक्षिक ज्ञान संगे अतिरिक्त क्रियाकलापमे ध्यान डेहलफे प्रिन्सिपल बोहरा बटैलै । कक्षा ९ सम पह्राई हुइटी आइल यी विद्यालयमे यिहे शैक्षिकसत्रसे ग्रेड बह्राके १० सम पह्रैना बटैलै ।

कार्यक्रममे पहुरा दैनिकके सम्पादक प्रेम चौधरी बोण्ड इंगलिस बोर्डिङ शैक्षिक गतिविधिसंग्गे अतिरिक्त क्रियाकलापमे फडको मारल बटैलै । उहाँ कहलै, ‘विद्यार्थीनके शिक्षा, स्वास्थ्यमे अभिभावक ध्यान डेहे पर्ना अवस्था बा । अभिभावकसे नास्ताके रुपमे बालबालिकाहुकन जंङक फुड डेहल कारण ओइनके स्वास्थ्यमे भारी असर परटी रहलमे आव सचेत हुइना जरुरी बा । विद्यार्थीके स्वास्थ्य विग्रलेसे पह्राईमे असर परठ ।’

कार्यक्रममे विद्यार्थी आरध्य बोहरा कौनोफे विद्यार्थी लक्ष्य लेके आघे बह्रना जरुरी रहल बटैली । उहाँ कहली, ‘विना लक्ष्य नेंगलेसे गन्तव्यमे पुग्ना नइपुग्ना कौनो ग्यारेण्टी नइरहठ । कौनोफे विद्यार्थी लक्ष्य ओ योजनाके साथ आघे बह्रलेसे गन्तव्य पुग्ना सहजुल हुइठ ।’ उहाँ अपने भविष्यमे पह्रके डाक्टर बन्के समाजके सेवा कैनाफे बटैली ।

विद्यालय व्यवस्थापन समितिके अध्यक्ष बजारीराम चौधरीके अध्यक्षतामे हुइल वार्षिकोत्सव तथा अभिभावक दिवस कार्यक्रममे नगेश पशुपति शिक्षा मन्दिरके प्रअ रतन चौधरी, विद्यार्थी यूवराज ढुङगानालगायत मन्तव्य राखल रहिट । कार्यक्रममे स्वागत मन्तव्य शिक्षिका कविता चौधरी ओ संचालन भाइस प्रिन्सिपल बमबहादुर धामी करल रहिट ।

वार्षिकोत्सव तथा अभिभावक दिवस कार्यक्रममे विद्यार्थीहुकनहे शैक्षिक तथा वार्षिकोत्सवके अवसरमे हुइल खेलकुद प्रतियोगितामे सहभागी विद्यार्थीनहे अभिभावक ओ पहुनाहुकनके हातसे पुरस्कार वितरण कैगिल बा । ओस्टेक विद्यार्थीहुकनसे टमान मेरिक प्रतिभा डेखागिल बा । टमान नृत्यके लाग शिक्षिका रुबी चौधरी ओ विना चौधरी कोरियोग्राफ करल रहिट । जेम्ने विद्यार्थीहुक्रनके एकल ओ समुहमे सांस्कृतिक नृत्य डेखैले बटै ।
कार्यक्रममे अभिभावकहुक्रे पूर्णबहादुर बोहरा, परसराम चौधरी, रणसिंह कुमाल, जयपति चौधरीलगायतसे पुरस्कार वितरण कैगिल बा ।