कैलारी ओ टीकापुरमे बालिका शसक्तीकरण रुपान्तरण कार्यक्रमके शुभारम्भ

पहुरा समाचारदाता
धनगढी, ४ फागुन । कैलाली जिल्लाके दुई पालिकामे बालिका शसक्तीकरण रुपान्तराण कार्यक्रमके शुभारम्भ हुइल बा ।
युनिसेफ नेपालके आर्थिक तथा प्राविधिक सहयोग, कैलारी गाउँपालिका ओ टिकापुर नगरपालिकाके सहकार्यमे सामुदायिक विकास केन्द्र (सिडिसि) मार्फत ‘गल्र्स मास्तर’ परियोजना अन्तरगत बालिका ससक्तिकारणके लाग कैलारी ओ टीकापुरमे शुकके रोज रुपान्तरण कक्षा सञ्चालन हुइल हो ।

बालबालिका तथा किशोर किशोरीहुकनके समग्र विकास कैना परियोजनाके लक्ष्य रहल बा । रुपान्तरण कक्षा कैलारी गाउँ पालिकाकके १५ ठो विद्यालय ओ १५ ठो समुदाय, उहे अनुरुपके कक्षा टिकापुर नगरपालिकामेफे १५ विद्यालय ओ १५ ठो समुदायमे करके ४२ हप्तासम्म सञ्चालनमे रहना बा । परियोजना मार्फत एक हजार आठ सय किशोर किशोरी प्रत्यक्ष लाभान्वित हुइही ।

श्री दिपेन्द्र मावि हसुलियामे कार्यक्रमके शुभारम्भ करटी कैलारी गाउँ पालिका अध्यक्ष राजसमझ चौधरी बालिकाके समग्र विकासके लाग ओइनके ससक्तीकरणमार्फत केल सम्भव रहल कहट्री यी परियोजनासे बालबालिका तथा किशोर किशोरीके विरुद्ध समाजमे रहल हानिकारक अभ्यासहे समेत सम्बोधन कैना अपेक्षा रहल बटैलै । परियोजना हाल कुछ सीमित स्कुल ओ समुदायमे लागु हुइलेसेफे अइना दिनमे पालिकासे यी कार्यक्रमहे थप विस्तार कैना उहाँ बटैलै । कार्यक्रममे वडा नम्बर ६ के वडा अध्यक्ष प्रेमबहादुर चौधरी, विद्यालयके प्रअ विनोद भट्टराई, नेपाली काँग्रेसके यूवा नेता राजु बराल लगाायतके उपस्थिति रहे ।

ओस्टेक, टिकापुर नगरपालिका वडा नम्बर ७ के वडाध्यक्ष यज्ञ प्रसाद न्यौपाने कार्यक्रमके शुभारम्भ करटी बालबालिकाके सकारात्मक रुपान्तरण मार्फत समाज परिवर्तन करे सेक्ना ओरसे यी कार्यक्रमहे नगरपालिकासे विशेष महत्वके साथ हेरटी रहल बटैलै ।

रुपान्तरण कक्षा सञ्चालन कैना आघे कैलारी गाउँपालिका ओ टिकापुर नगरपालिकाका १५÷१५ जाने किशोर किशोरीहे १० दिनके प्रशिक्षक प्रशिक्षण तालिम प्रदान कराइल रहे ।