जनप्रिय सामुदायिक वनके १५ औं वार्षिक साधारणसभा
जीवन चौधरी
पहलमानपुर, ७ फागुन । कैलालीके घोडाघोडी नगरपालिका–१२ खोँपामे रहल जनप्रिय सामुदायिक वन उपभोक्त समुहके १५औं बार्षिक साधारणसभा तथा सार्वजनिक सुनुवाई कार्यक्रम शनिच्चरके रोज सम्पन्न हुइल बा ।
घोडाघोडी नगरपालिका–१२ के वडा अध्यक्ष रामदुलारे चौधरीके वरका पहुनामे हुइल कार्यक्रममे उहाँ सामुदायिक वनसे अपनेहुक्रे समन्वय करके जैना प्रतिवद्धता जनैलै ।
खास पहुना सव डिभिजन वन कार्यालय पच्मुडियाके रेञ्जर केशव पोख्रेल सामुदायिक वनभित्तर रहल कमीकम्जोरीहे सच्याके आघे बह्रना आग्रह करलै ।
संचारकर्मी तथा पहुरा दैनिकके पहलमानपुर समाचारदाता जीवन चौधरी सामुदायिक वनमे पारदार्शिता अपनैना जरुरी रहल बटैलै ।
घोडाघोडी–१२ पुरैनाके अध्यक्ष परना चौधरी सामुदायिक वनहे नीति विधान अनुसार आघे बह्रनामे जोर डेलै । सामुदायिक वनके सचिव मनिषा चौधरी आयव्यय प्रस्तुत करल रहिट ।
उ सामुदायिक वनके अध्यक्ष सुरेश चौधरीके घरगोस्यामे हुइल कार्यक्रममे बाल प्राविके अध्यक्ष सुखराम चौधरी, खोपा गाउँक भल्मन्सा भिखुराम चौधरी, पहलमानपुर सिएफसिसिके सदस्य शिवकुमार उमार लगायत मन्तव्य राखल रहिट । कार्यक्रमके संचालन खडक चौधरी करल रहिट ।
