संरक्षण विहिन बालबालिकाहुकनहे शैक्षिक सामाग्री वितरण

पहुरा समाचारदाता
हसुलिया, १३ फागुन । संरक्षण विहिन बालबालिकाहुकनहे शैक्षिक सामाग्री तथा स्कूल व्याग वितरण कैगिल बा ।

कैलारी गाउँपालिका महिला तथा बालबालिका शाखासे संरक्षण विहिन बालबालिकाहुकनहे शैक्षिक सामाग्री तथा स्कूल व्याग वितरण कैगिल हो । गाउँपालिका उपाध्यक्ष भगवतीकुमारी चौधरीके वरका पहुना हुइल एक कार्यक्रमके विच उ शैक्षिक सामाग्री वितरण कैगिल हो ।

कार्यक्रममे सम्बोधन करटी उहाँ छोट सहयोगसे विद्यार्थीहुकनके भविष्य बने सेक्ना बटैली । उहाँ कहली–‘जौन बालबालिकाके डाईबाबा नइहो कलेसे आर्थिक अभावसे किताव, कलम, कापी, झोला किने नइसेक्ना अवस्था रहे सेकठ । जेकर अभावसे पह्राईमेफे भारी असर परठ । यी सहयोगसे ओइनके भविष्यफे बने सेकठ ।’उहाँ पालिकासे कैगिल सहयोगके सदुपयोग कैना आग्रह करली ।

कैलारी गाउँपालिकाके प्रमुख प्रशासकीय अधिकृत लक्ष्मी दत्त भट्ट संरक्षण विहिन बालबालिकाहुकनहे शैक्षिक सामाग्री तथा स्कूल व्याग वितरणसे वृति विकासमे टेवा पुग्न बटैलै । समाजमे अभिनफे आर्थिक अभावसे पह्राई नइसेक्ना कोई कोई हुइसेक्ठै । अभिभावक विहिन बालबालिकाहे झन पह्रर्ना कर्रा हुई सेकठ । यी मेरिक सपोटसे ओसिन बालबालिकाहे पह्राईमे भारी सहयोग पुग्ना प्रमुख प्रशासकीय अधिकृत भट्ट बटैलै ।

कैलारी गाउँपालिका वडा नम्बर ६ के वडा अध्यक्ष प्रेमबहादुर चौधरी संरक्षण विहिन बालबालिका अब्बे जेकर संरक्षणमे बटै ओइने अपन लर्काहस माया कैडेना आग्रह करलै । जेकर डाईबाबा नइरहल, बाबा केल रहल या डाई केल रहल ६० जाने बालबालिकाहुकनहे वडा कार्यालयके सिफारिसमे उ सामाग्री वितरण कैलारी गाउँपालिका महिला तथा बालबालिका शाखा प्रमुख बालकुमारी चौधरी बटैली ।

संरक्षणविहिन बालबालिकाहुकनके लाग शैक्षिक सामाग्री वितरण तथा सहगोग कार्यक्रम अन्र्तगत काँपी, कलम, ज्यामित्री बक्स ओ झोला वितरण करल उहाँ बटैली ।