स्ट्रीप लाइट जडानसे ६ लेन सडकमे रात्रिकालिन सौन्दर्य बह्रल
पहुरा समाचारदाता
धनगढी, १४ फागुन । धनगढीके ६ लेन सडकमे स्ट्रीप लाइट जडान करलपाछे झकमक्क बनल बा ।
भन्सारसे मोहनपुरके ६ लेन सडक क्षेत्रमे स्ट्रीप लाइट जडान करल हो । स्ट्रीप लाइट ओ विमानस्थल रोडमे जडान करल स्ट्रीट लाइटके अँटवार साँझ प्रदेशके भौतिक पूर्वाधार विकास मन्त्री प्रकाशबहादुर देउवा उदघाटन करल रहिट । उपमहानगरपालिकासे अपन लगानीमे विमानस्थल सडकमे ५६ ठो सडक बत्ती जडान करले बा । ओस्टेक ६ लेन सडकके २६५ पोलमे स्ट्रीप लाइट जडान करल बा । ६ लेन सडकके १४० ठो ट्रीगार्डमेफे स्ट्रीप लाइट जडान करल बा ।
विमानस्थल सडकमे करिब १० लाखके लागतमे सडक बत्ती जडान करल बा ओ ६ लेन सडकमे ३१ लाखके स्ट्रीप लाइट जडान करल नगर उपप्रमुख कन्दकलाकुमारी राना बटैली । उहाँ करिब ३ लाख लागतमे भन्सारमे गेटमे फलोड लाइट जडान हुइल बटैली ।
स्ट्रीप लाइटके उदघाटन करटी भौतिक पूर्वाधार विकास मन्त्री प्रकाशबहादुर देउवा धनगढीहे सुन्दर सहर बनैना तीनु तहके सरकारके सहकार्यमे विकास निर्माणके काम हुइटी रहल बटैलै । उहाँ ६ लेन सडकमे जडान करल स्ट्रीप लाइटसे रात्रिकालिन सौन्दर्यहे बढैना बटैलै ।
“स्ट्रीप लाइटके जडानसे धनगढीके ६ लेन सडकके सुन्दरता बढाई । प्रदेशके एक ठो केल उपमहानगरहे नमुना सहर बनैना तीनु तहके सरकारसे मिल्के काम करे परठ,“ उहाँ कहलै, “धनगढीके विकास निर्माणमे प्रदेश सरकारसे सेक्ना सहयोग कैना बा ।
“स्ट्रीप लाइट उदघाटन कार्यक्रममे नगर प्रमुख गोपाल हमाल, वडा अध्यक्ष ओ सदस्यहुक्रे, निमित्त प्रमुख प्रशासकीय अधिकृत नरेन्द्रसिंह खाती, नगरपालिकाके कर्मचारी ओ सर्वसाधारणके उपस्थिति रहल रहे । स्ट्रीप लाइट जडान पश्चात् ६ लेन सडकके सुन्दरता थप बह्रल कहटी सर्वसाधारण खुशी व्यक्त करले बटै ।
