घोडाघोडी नगर भल्मन्सामे बुधराम विजयी
पहुरा समाचारदाता
धनगढी, १४ फागुन । कैलालीके घोडाघोडी नगर स्तरीय भल्मन्सा कार्यसमितिके अध्यक्षमे बुधराम चौधरी निर्वाचित हुइल बटै ।
अपन प्रतिस्पर्धि फागुराम चौधरीहे २५ मत अन्तरले पराजित कैटी बुधराम ५९ मत ल्यानके निर्वाचित हुइलक हुइट । ७५ मत खस्लकमे फागुराम २४ मत केल ल्यानल रहिट ।
बुधराम यी आघेफे घोडाघोडी नगर भल्मन्सा समितिके अध्यक्ष रहिट । ओस्टेक करके सचिवमे ४० मत ल्यानके अमन चौधरी विजयी हुइल बटै । हुकान प्रतिस्पर्धि वीरबहादुर चौधरी २९ मत केल पैलै । लौव नेतृत्वके लाग राजनीतिक रूपमे प्यानल सहित दुई टिम निर्वाचनमे उटरल रहिट । बुधराम ओ अमन काँग्रेस निकट हुइट कलेसे पराजित हुइलक फागुराम ओ वीरबहादुर माओवादी निकटके उम्मेदवार हुइट । ७५ मत खस्लकमे २ मत बदर हुइल रहे ।
अध्यक्ष ओ सचिवमे केल निर्वाचन हुईबेर उपाध्यक्ष, सहसचिव कोषाध्यक्ष सहित सदस्य पदमे सर्वसम्मत चयन हुइल रहे । उपाध्यक्षमे दाशीराम चौधरी, सह सचिवमे रिम चौधरी ओ कोषाध्यक्षमे सितावी चौधरी सर्वसम्मत चयन हुइल रहे ।
ओस्टेक करके सदस्यमे हिरालाल चौधरी, तालबहादुर चौधरी, पहालु चौधरी, मल्लराज चौधरी, नमिता चौधरी, डल्लु डगौरा, श्रीकृष्ण चौधरी, सरोज चौधरी, तेजराम चौधरी, दुर्गा देखी चौधरी, दुतिराम चौधरी ओ इन्द्रा कठरिया सर्वसम्मत हुइट बाट ।
अध्यक्ष ओ सचिवमे ढेर उम्मेदवार डेखलपाछे चुनाव कैना अवस्था आइल रहे । अध्यक्ष पदके लाग बुधराम चौधरीहे घोरुवा चुनाव चिन्हा ओ फागुराम चौधरीहे मछरिया चुनाव चिन्ह डेहल रहे । ओस्टेक सचिव पदके लाग विरबहादुर चौधरीहे चिरैया ओ अमन चौधरीहे बघुवा चुनाव चिन्ह डेहल रहे ।
