महिलानहे ४५ दिने लेवल–२ निशुल्क सिलाई कटाई तालिम डेगिल

पहुरा समाचारदाता
हसुलिया, १४ फागुन । महिलाहुँक्रनहे उद्यमी बनाइक लाग लेवल–२ के ४५ दिने सिलाई कटाई तालिम डेगिल बा ।
कैलारी गाउँपालिका नम्बर ४ के आर्थिक सहयोग ओ व्यावसायिक तथा सीप विकास तालिम केन्द्र धनगढीके आयोजनामे २२ जाने महिलाहुँक्रनहे लेवल २ के निशुल्क सिलाई कटाई तालिम डेगिलक हो । महिलाहुँक्र सिलाई कटाई सिखके व्यावसायिक रुपमे सक्षम होइट कहिके ४५ दिने तालिम डेगिलक वडा अध्यक्ष ठागुराम चौधरी बटैल । उहाँ तालिम समापन कार्यक्रमके बरका पहुना समेट रहल रहिट ।

व्यावसायिक तथा सीप विकास तालिम केन्द्र धनगढीके प्रमुख भुवन पन्त अपनहुँक्रे संचालन कैना तालिममे सबसे ढेर थारु समुदायके महिलाहुँक्रे सहभागिता हुइटी आइल जनैलै । उहाँ कहलै, ‘पहिले थारु समुदायहुँक्रे धान गोँहुके तिहाई डेके (दर्जी) धरना चलन रहे । अब्बे थारु समुदाय अपन घल्ना पोशक अपनही सिल्नामे सिपार हुइल बटै । उहाँहुक्रे व्यावसायिक रुपमे आघे बह्रल बटै ।’
४५ दिनसम सिलाई कटाई तालिम समापन कार्यक्रम कार्यपालिका सदस्य लालबहादुर विकके अध्यक्षतामे हुइल रहे । कार्यक्रममे वडा सदस्य लक्ष्मी चौधरी ओ सुवा परियार लगायत सहभागिता रहे । तालिममे प्रशिक्षण प्रतिभा रिजाल डेहल रही ।