गाउँपालिकाभिटर संचालित योजनाके अनुगमन
पहुरा समाचारदाता
हसुलिया, १५ फागुन । कैलारी गाउँपालिकाभिटर संचालनमे रहल टमान योजनाके अनुगमन समितिसे मंगरके रोज अनुगमन कैगिल बा ।
पालिकास्तरीय अनुगमन समितिके संयोजक भगवतीकुमारी चौधरीके नेतृृत्वमे गाउँपालिकाके गौरवके योजनाके रुपमे रहल निर्माण कार्य अन्तिम चरणमे पुगल १५ शैयाके अस्पतालके अनुगमन करल बा । यी अस्पतालके सक्कु निर्माण कार्य यिहे आर्थिक वर्ष सेक्ना करके काम हुइटी रहल बा । यहाँ पानीके निकासमे समस्या डेखल अनुगमन समितिसे जनैले बा ।
हरेक स्थानीय तहमे अस्पताल हुई पर्ना संघीय सरकारके नीति अनुसार उ अस्पताल निर्माण करल हो । वडा नम्बर ५ बैजपुरमे रहल यी अस्पताल दुई वर्षमे काम सम्पन्न कैना करके निर्माण सुरु हुइल रहे । संघीय सरकारके लगानीमे निर्माण हुइटी रहल अस्पतालके लागत भ्याटसहित १८ करोड ५२ लाख रुप्या रहल बा ।
अस्पताल निर्माणके लाग २०७९ असार २९ मे रोयल कन्स्ट्रक्सन जेभीसंग निर्माण ठेक्का सम्झौता हुइल रहे । अस्पताल निर्माणके अवधि अइना असारसम रहल बा ।
कैलारी गाउँपालिका वडा नम्बर ३ स्थित सुर्मिनाला पुलसे शिव मन्दिरसमके रु ७ लाख बजेटमे सडकमे ग्राभेलके काम सम्पन्न हुइल बा । गोबरैलासे पलिया–रतनपुर सडक कालोपत्रे योजनाके काम सब वेशसम्म हुइल बा । ठाउँ–ठाउँमे होमपाइप जडान करे पर्नामे जडान कैगिल भेटाइल अनुगमन समिति जनैले बा ।
अनुगमनमे समितिके संयोजक भगवतीकुमारी चौधरी, प्रमुख प्रशासकीय अधिकृत लक्ष्मी दत्त भट्ट, वडा नम्बर ६ के वडा अध्यक्ष प्रेमबहादुर चौधरी, कार्यपालिका सदस्य सुनिला चौधरी, योजना शाखा प्रमुख सन्तोषकुमार चौधरी, प्राविधिक असिस्टेन्ट सबइन्जिनियर रवि शंकर चौधरी ओ हिमाल कुश्मीलगायतके उपस्थिति रहे ।
