चैतन्य बाल साहित्य सम्मेलन
पहुरा समाचारदाता
धनगढी, १५ फागुन । धनगढी शिवनगर ५ मे रहल चैतन्य पाठशालासे चैतन्य बाल साहित्य सम्मेलन एक कार्यक्रम आयोजना करके सम्पन्न हुइल बा । मंगरके रोज विद्यालयके प्राङगनमे बाल साहित्य सम्मेलन आयोजना करल हो ।
चैतन्य पाठशालाके पिटीए अध्यक्ष ईश्वर गिरीके सभाध्यक्षमे हुइल बाल साहित्य सम्मेलनमे बरका पहुना साहित्यकार बद्री शर्मा बिनाडी रहल रहिट । चैतन्य बाल साहित्य सम्मेलनके स्वागत मन्तव्य व्यक्त करटी प्रधानाध्यापक कटक सिँह शिक्षासहित संस्कारके सिकाई रहल चैतन्य विद्यालय तहसे ज्ञानगुनके बाट उजागर करटी रहल बटैलै ।
विद्यालय तहसे विद्यार्थी टमान रचनात्मक कृयाकलापसहित यैसिन साहित्य क्षेत्रके माध्यमसे ओइनके सीप कला क्षमता ओ ज्ञानगुनके बाटके वृद्धि विकास हुइना बटैलै ।
कितावी ज्ञान वाहेक यैसिन रचनात्मक ओ सिर्जनशिलतासेफे विद्यार्थीहुकनके वौद्धिकता बह्रना उहाँ विश्वास लेले बटै । ओस्टेक चैतन्य पाठशालाके सीइओ गणेशप्रसाद जोशी पाठशालासे २० वर्षपाछे काम लग्ना शैक्षिक गुणस्तरीय शिक्षा डेटी रहल बटैलै । विद्यालयमे वेद ओ विज्ञानहे सँगसँगे पढैटी रहल ओ विद्यार्थीहुकनहे अब्बेक समय परिवेश अनुसार आवश्यकता परल शिक्षा अनुकूल स्मार्ट बोटसेफे पठनपाठन करैटी रहल जानकारी डेलै ।
कार्यक्रममे टमान विद्यार्थी अपनही रचना करल गित कविता, गजल लगायतके साहित्यक रचना सुनैले रहिट । कार्यक्रममे कक्षा ८ मे अध्ययनरत बिद्यार्थी जेनी चौधरी मै के हु कना ज्ञानवद्र्धक कविता सुनैले रहिट । ओस्टेक उमेश भाट, नेत्र कार्की, बर्षा कुवँरलगागत रचना प्रस्तुत करल रहिट ।
कार्यक्रममे कैलाली बहुमखी क्याम्पसके सहायक प्राध्यापक गणेश प्रसाद जोशी बाल साहित्य सम्मेलनसे विद्यार्थीके चौतर्फी विकास कैना सहयोग करटी कहटी आयोजकहे धन्यवाद डेलै ।
उहाँ विद्यालयसे केवल पठनपाठन केल करके नइहुइना कहटी यैसिन रचनात्मक ओ सिर्जनशिलताहे जोड डेहे पर्ना बटैलै । सहायक प्राध्यापक जोशी कहलै, विद्यार्थीसे किताबी बाट घोक्न, रटैना, परम्पराहे तुरे परठ, खेल्न रमैना सिख्टी जाई पर्ना आवश्यक रहल बटैलै ।
