सुदूरपश्चिममे तीन मन्त्रीहे जिम्मेवारीसे हटागैल
पहुरा समाचारदाता
धनगढी, २२ फागुन । सुदूरपश्चिम प्रदेशमे नेकपा माओवादी केन्द्रसे सहभागी हुइल दुई जाने मन्त्री ओ एक राज्यमन्त्रीहे जिम्मेवारीसे हटाइल बा ।
नेपालके संविधानके धारा १६८ के उपधारा ९ बमोजिम प्रदेश सरकारके मन्त्रिपरिषदके जिम्मेवारी हेरफेर ओ कार्यविभाजन करल मुख्यमन्त्री कमल बहादुर शाह जानकारी डेलै । मंगरके पत्रकार सम्मेलन मार्फत उहाँ मुख्यमन्त्री तथा मन्त्रिपरिषदके कार्यालय, उद्योग पर्यटन, वन तथा वातावरण मन्त्रालय ओ सामाजिक विकास मन्त्रालय अप्ने जिम्मेवारी लेटी अन्य मन्त्रालय यथावत राखल जानकारी डेलै ।
केन्द्रमे एमाले सहित माओवादीके गठबन्धन हुइलपाछे प्रदेशमे मुख्यमन्त्री शाह माओवादीसे प्रतिनिधित्व करुइया मन्त्रीहे जिम्मेवारीसे हटाइल हो । उद्योग पयर्टन वन तथा वातावरण मन्त्री रमेश धामी, सामाजिक विकास मन्त्री झपट साउँद ओ उद्योग राज्यमन्त्री गितादेवी मालहे जिम्मेवारीसे हटाइल बा ।
माओवादीसे मन्त्री हुइलहे हटैलेसे फेन नेकपा (एकीकृत समाजवादी) ओ नागरिक उन्मुक्ति पार्टीसे मन्त्रीके जिम्मेवारीमे रहलहे भर यथावत राखल बा । सुदूरपश्चिममे नाउपा ओ नेकपा(एस) के समर्थन कायम रलेसे मुख्यमन्त्रीहे मजासे बहुमुत पुगठ् । उहे मारे मुख्यमन्त्री माओवादीसे मन्त्री बनलहे हटाइल हो ।
सुदूरपश्चिम प्रदेशमे नेपाली कांग्रेसके १८, माओवादी केन्द्रके ११, एमालेके १०, नाउपाके ७, नेकपा (एकीकृत समाजवादी) के ४, राप्रपा एक ओ स्वतन्त्र एक जाने सांसद रहल बाटै । कलेसे एक सिट रिक्त रहल बा ।
उहे बिच मुख्यमन्त्री शाह अपने सक्कु जनहनहे मिलाके लैजाइक लाग अपने जैसिन फेन सहमति कैना तयार रहल बटैले बाटै । उहाँ अपने गठबन्धन बचैना मान्यतामे रहल फेन बटैलै । ‘गठबन्धन दल भिट्टर हम्रे संवादमे बाटी । हम्रे अब्बे फेन गठबन्धनहे बचाइ परल कना मान्यतामे बाटी’ उहाँ कहलै, ‘हम्रे सक्कु जनहनहे मिलाके लैजैनामे जैसिन फेन सहमति कैना तयार बाटी ।’
उहाँ राष्ट्रिय राजनीतिमे जैसिन प्रभाव परलेसे अपने प्रदेशमे एमालेसे फेन सहकार्य कैना तयार रहल बटैलै ।
‘राष्ट्रिय राजनीतिके प्रभाव प्रदेशमा परलेसे फेन हम्रे संवादमे बाटी । हम्रे माओवादीके संघरियनहे सङ्घीय सरकारमे औरे परिस्थिति बन्लेसे फेन प्रदेशमे मिलके जाइ ना कना बात फेन बा’ उहाँ कहलै ‘ओत्रे किल नैहोके हम्रे एमाले लगायतके सक्कु दलसे लावा परिस्थिति निर्माण कैके आघे बह्री कना फेन रहल बा ।’
