शिक्षा स्वास्थ्य तथा वातावरण अधिकार सम्बन्धी छलफल

पहुरा समाचारदाता
धनगढी, २२ फागुन । अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय धनगढीके आयोजनामे सुदूरपश्चिम प्रदेश स्तरीय मानव अधिकार समुह÷रक्षक संजाल विच शिक्षा स्वास्थ्य तथा वातावरण अधिकार सम्बन्धी छलफल कार्यक्रम कैगिल बा ।

मानव अधिकार समुह सुदूरपश्चिम प्रदेश संयोजक गोविन्द प्रसाद सापकोटाके अध्यक्षतामे हुइल कार्यक्रममे सहजीकरण करटी इन्सेक प्रदेश संयोजक खडकराज जोशी सर्वसधारण आमजनता गुणस्तरीय शिक्षा, स्वास्थ्य तथा वातावरण अधिकारसे बञ्चित रहल बटैलै । उहाँ कहलै, ‘सामुदायिक विद्यालयमे निशुल्क शिक्षा कहल बा मने गुणस्तरीय शिक्षा डेहे नइसेकल, स्वास्थ्य संस्थामे निशुल्क पैना औषधी नइपैले हुइट । टमान ठाउँमे उद्योग संचालनमे रहल मने उ उद्योग वातावरणमे पर्ना असरबारे ध्यान नइडेहल हो ।’ कञ्चनपुरमे भागेश्वर चिनी मिल ओ महाकाली चिनी मिलसे निकरल राशायनसे उ ठाउँमे भारी असर पारल मने सरकारके खासे ध्यान नइगैल बटैलै । कैलाली ओ कञ्चनपुरमे गठित मानव अधिकार समुहहे विगतमे सम्पन्न हुइल क्रियाकलापके उपलब्धीहे हासिल कैना करके कार्यक्रम कैना आग्रह करलै ।

कार्यक्रममे मानव अधिकार समुहके संयोजक गोविन्द प्रसाद सापकोटा बेलौरीमे टमान मेरिक सचेतनामुलक कार्यक्रम मार्फत विद्यालयमे जनचेतना फैलाइल बटैलै । लालझाँडी गाउँपालिका स्तरीय समुहके संयोजक सोमनाथ राना अपने लागु औषध दुव्र्यशनी न्यूनिकरण हानिकारक अभ्यास विरुद्धके टमान कार्यक्रम संचालन करल बटैलै ।

संजालके सदस्य तथा गोदावरी नगरपालिका स्तरीय संजालके संयोजक नरदिप धामी अवैध रुपमे चुरे दोहन हुइटी रहल बटैलै । उहाँ कहलै, अवैध रुपमे चुरे दोहनसे तटिया क्षेत्रके बासीनहे जोखिल बा ।’

छलफल कार्यक्रममे संजालके सदस्य तथा गैसस महासंघ प्रदेश संयोजक देवी खनाल, फियान नेपालके प्रदेश संयोजक मुकुन्द राना, नेपाल पत्रकार महासंघ कैलाली सचिव प्रेम चौधरी, संजालके सदस्य कमला चौधरी, मानबहादुर चौधरी, धना जोशी, रुपेश खरेल, इन्सेकके कार्यक्रम संयोजक राजकुमार चौधरी, संजालके सचिव कैलाश पनेरु, जिल्ला प्रतिनिधि मैनामोति चौधरीलागतके सहभागिता रहे ।