विपद् व्यवस्थापनमे प्रहरीके सह्रनिय काम

काठमाडौं नागार्जुन नगरपालिका–४ बाफल महाडोल बसोबास कैना ५० वर्षीया महिला काम कैना क्रममे फागुन २ गते अचानक कुवाँमे गिरली । विपद् व्यवस्थापन कार्यालय सामाखुशीसे उद्दार सामग्रीसहित खटल प्रहरी टोली करिब १ सय फिट गहिर कुवाँसे महिलाहे सकुशल उद्दार करके उपचारके लाग मनमोहन अस्पताल पठाइल । ओस्टेक करके ललितपुरके महालक्ष्मी नगरपालिका–३ नबिनटोल बैठना दोलखाके २८ वर्षीया महिला गैल माघ १ गते अपने घर कम्पाउण्डमे रहल करिब ३० फिट गहिर कुवाँमे गिरल जानकारी पैटीकी नेपाल प्रहरी सहितके उद्दार टोली सकुशल उद्दार करके थप उपचारके लाग पाटन अस्पताल लैगिल ।

यी दुई घटना ते प्रतिनिधि पात्र केल हुइट । यैसिक विपद्मे परल व्यक्तिहुकनके उद्दार कर घटना ढेर बा । भूकम्प, बाढ, पहिरो ओ भूक्षय, हावाहुरी, आगलागी, चट्याङ, शीतलहर, सवारी दुर्घटना, विमान दुर्घटना, औद्योगिक दुर्घटना, पशु आतंक आदि जैसिन विपद् आपरल अवस्थामे नेपाल प्रहरी सक्रिय रूपमे उद्दारमे जुट्न करल बा । नेपाल प्रहरीसे विपद् व्यवस्थापनमे आर्थिक वर्ष २०७८/०७९ मे ३५ हजार ५९७ जाने, आर्थिक वर्ष २०७९/०८० मे ४१ हजार ३६७ जाने ओ चालु आर्थिक वर्षके ७ महिनामे २४ हजार ३१९ जानेक करके जम्मा १ लाख १ हजार २८३ जाने जनशक्ति परिचालन करल बा । आर्थिक वर्ष २०७८/०७९ मे ३ हजार ९३१ ठो, आर्थिक वर्ष २०७९/०८० मे ६ हजार २२९ ठो ओ चालु आर्थिक वर्षके ७ महिनामे ३ हजार २२४ ठो विपद्के घटना हुइल रहे । उ घटनामे उद्दारके लाग २४ हजार ३१९ जाने प्रहरी परिचालन करल रहे । उ मध्ये आगलागीके १ हजार ९२७ ठो, पहिरोके ५२३ ठो, जनावर आक्रमण २७७ ठो, अविरल वर्षा १६९ चो, बाढ १२४ चो भूकम्प ६९ चो चट्याङ ६३ चो, लेक लग्ना ४५ ठो, हावाहुरी ११ चो, हिमपहिरो ३ चो हिमपात/शितलहर/डुंगा दुर्घटना १/१ चो ओ अन्य १० ठो घटना हुइल रहे । उ मध्ये से ढेर आगलागीके घटना हुइल रहे । उ घटनामे परके ३१२ जानेक मृत्यु हुइल बा । १ हजार १११ जाने घाहिल हुइल बटै कलेसे ९ जाने वेपत्ता हुइल बटै ।

शान्ति सुरक्षामे अहोरात्र खटटी रहना नेपाल प्रहरी विपद् व्यवस्थापन तथा न्यूनीकरण अभियानमेफे सक्रिय बा । चालु आर्थिक वर्षमे जाजरकोट लगायतके ठाउँमे करके ६९ चो भूकम्पके धक्का महसुस हुके १ सय ५५ जानेक दुःखद मृत्यु हुइल कलेसे ४ सय ९ जाने घाहिल हुइलै । तत्काल २ हजार ५०४ जाने प्रहरी कर्मचारी उद्दारमे परिचालन हुइलै । यैसिन घटनामे सरकारी तथा गैह्रसरकारी सरोकारवालासंग समन्वय करके प्रभावकारी खोज तथा उद्दार कार्य कैना करल रहे । विपद् जोखिम न्यूनीकरण तथा व्यवस्थापन ऐन, २०७४ से सुरक्षा निकायसे आपत्कालिन खोज, उद्दार तथा राहत वितरणमे प्रभावकारी रूपमे सम्पन्न कैना व्यवस्था करले बा । उहे अनुरूप नेपाल प्रहरीसे विपद् घटनाके व्यवस्थापन कैना विशिष्ट उद्दार उपकरणसहित तत्काल उद्दार टोली खटैना करल बा ।