महिलाहुक्रे हिन्सा सहके बैठल अवस्था बाः गाउँपालिका उपाध्यक्ष

पहुरा समाचारदाता
हसुलिया, २५ फागुन । कैलारी गाउँपालिकाके सक्कु वडामे ११४औं अन्र्तर्राष्ट्रिय महिला दिवस मनागिल बा ।

दिवसके अवसरमे टमान कार्यक्रममे सहभागी गाउँपालिका उपाध्यक्ष भगवतीकुमारी चौधरी महिलाहुकनहे संविधानहे डेहल अनुसारके अधिकार व्यवहारमे कार्यान्वयन नइहुइल बटैले बटी । उहाँ कहली, ‘महिला पुरुष बराबर कहल बा । मने व्यवहारमे कार्यान्वयन नइहुइल हो । पितृ सतात्मक सोच रहल कारण महिला अभिनफे दबादमे रहल बाटी । गाली गलौच सहिके मारपिट खाकेफे बैठे पर्ना अवस्था बा ।’

गाउँपालिका उपाध्यक्ष कहली, ‘घर व्यवहार चलैना, लर्कापर्का हेर्ना पह्रैना महिलाके जिम्मा रहठ । सामान कामके सामान ज्याला कहल बा मने कार्यान्वयन हुइल नइहो । देशमे विकृति आइटा, हत्या हिंसा बह्रल बा । कञ्चनपुरमे नेपाली चेली निर्मला पन्तके बलात्कारपाछे हत्या हुइल दोषी अभिन पत्ता नइलागल हो । वहाँ न्याय नइपैली ।’
महिला हिंसामे परल पीडा नुकाके बैठल बटी । घरेलु हिंसा झन बह्रल बा । घरेलु हिंसाहे सहके बैठल । टबमारे महिला सक्षम हुइना, हरेक तह तप्कामे सहभागी करैना जरुरी बा, उहाँ कहली ।

महिला आत्मनिर्भर नइहुइटसम हिंसामे परही । सरकार महिललनमे लगानी कैना चाही । महिलाहुकनहे गर्भवती अवस्थासे लरको¥यासम पुरुषहुक्रे सहयोग नाइकरलेसे स्वास्थ्य बच्चा जल्माई ओ हुर्काई नइसेकब । महिला रुक्लेसे सृष्टिफे रुकी गाउँपालिका उपाध्यक्ष कहली ।

वडा नम्बर ५ पवेरामे चेतनशिल महिला विकास बहुउद्देश्यीय सहकारी संस्थाके आयोजना तथा टमान संघ संस्थाके सहकार्यमे हाजिरी जवाफ प्रतियोगिता, सचेतनामुलक सडक नाटक, ओ टमान गाउँक सांस्कृतिक नाँच डेगिल रहे ।

चेतनशिल महिला विकास बहुउद्देश्यीय सहकारी संस्थाके अध्यक्ष हिरा चौधरीके अध्यक्षतामे हुइल कार्यक्रममे बरका पहुना वडा नम्बर ५ के वडा अध्यक्ष विष्णु प्रसाद चौधरी रहल रहिट । कार्यक्रममे सम्बोधन करटी उहाँ नीतिमे महिला ओ पुरुष बराबर कहल मने व्यवहारमे लागु नइहुइल बटैलै । महिलाहुक्रे सामान काम करेबेर सामान ज्याला नइपाइल बटैलै ।

महिलाहुकनहे हेर्ना दृष्टि अभिनफे परिवर्तन नइहुइल हो,’ उहाँ कहलै, ‘सरकार महिलाहुकनके लाग टमान नीति बनैले बा । मने महिलाहुक्रे उपभोक्त करे नइपाइल हुइट । कतिपय नीति तथा कानून महिलाहुकनहे जानकारी डेहल नइहो ।

कार्यक्रममे ओरेक नेपालके जिल्ला संयोजक गीता चौधरी सामान काममे महिलाहुकनहे विभेद करल बटैली । गाउँघर हानिकारक प्रथा रहल कारण महिला हिंसा भोगे परल उहाँ बटैली । समाजमे छाईनहे हरेक काममे अंकुश लगाइल मने छावनहे छुट्टा छोरल बटैली । कैलालीमे छाईनहे अंश ओ वंश बराबर कहिके अभियान सुरुवाट करलफे उहाँ बटैली ।

कार्यक्रममे हाजिरी जवाफ प्रतियोगितामे जवदहुवा गाउँक महिला टोली ८ नम्बर नानके पहिल हुइल बटै । दुसरा स्थान मन्कापुर ओ टिसरामे सडकपुरमे महिला टोली आइल बा । पहिल टिमहे रु. २०२०, दुसरामे रु.२०१५, टिसराहे रु.२०१० प्रदान कैगिल बा । ओस्टेक सहभागी गोवरैलाके दुई महिला टोली, पवेरा, सपना शिविर, पालिया, बैजपुरके महिलाहुकनहे सन्त्वानाुसहिट रु. २ हजारके दरसे प्रदान कैगिल बा । कार्यक्रममे स्वागत मन्तव्य चेतनशिल महिला विकास बहुउद्देश्यीय सहकारी संस्थाके उपाध्यक्ष सुशिला चौधरी ओ संचालन सह व्यवस्थापक तिरथ कुमारी चौधरी करल रहिट ।

ओस्टेक करके वडा नम्बर १ हसुलियामे कैलारी गाउँपालिका महिला तथा बालबालिका शाखाके आयोजना ओ टमान संघ संस्थाके सहयोगमे सम्मान, टमान प्रतियोगिता, ओ सांस्कृतिक नाँच डेखगिल रहे ।

११४औं अन्र्तर्राष्ट्रिय महिला दिवस कैलारी गाउँपालिका वडा नम्बर ७ मे, वडा नम्बर २, वडा नम्बर ३, वडा नम्बर ४, वडा नम्बर ६, वडा नम्बर ८ ओ वडा नम्बर ९ मे टमान कार्यक्रम करके मनागिल बा ।